गोंयांतलो पावसाळो आनी रस्त्यां वयले ‘चिरंतन’ फोंड
1 : पावसाळो सुरू जालो की फोंडकुलां इतले कित्याक वाडटात? पावसाचें उदक रस्त्या वयल्या ल्हान-ल्हान भेगांनी रिगता. गाडयांच्या वजनाक लागून डांबर आनी खडी हांची पकड सैल जाता. सतत पडपी पावसाक लागून रस्त्याचो वयलो थर उखडपाक लागता आनी कांय दिसांनीच फोंडकुलां तयार जातात. गोंयांत जून ते सप्टेंबर ह्या काळांत उटं
1 : पावसाळो सुरू जालो की फोंडकुलां इतले कित्याक वाडटात?
पावसाचें उदक रस्त्या वयल्या ल्हान-ल्हान भेगांनी रिगता. गाडयांच्या वजनाक लागून डांबर आनी खडी हांची पकड सैल जाता. सतत पडपी पावसाक लागून रस्त्याचो वयलो थर उखडपाक लागता आनी कांय दिसांनीच फोंडकुलां तयार जातात. गोंयांत जून ते सप्टेंबर ह्या काळांत उटंगाराचो पाऊस पडटा, देखून ही समस्या चड खर जाता.
2 : फकत पावसाळोच हाका जापसालदार?
ना. जाणकारांच्या मतान फोंड, होंडक्या फाटल्यान जायतीं कारणां आसतात.
- बाबत दर्जाचें सामान वापरप
- उणे जाडयेचें डांबरीकरण करप
- कामांतली ताकतीक, बोवाळ
- योग्य दाब (कॉम्पॅक्शन) ना दिवप
- उदक सारकें व्हांवन वचनासतना तुंबप
- रस्ते परतून परतून खणप
- योग्य वेळार देखभाल करप ना
पावस ह्या सगळ्या उणावांक एक- दोन दडकांनी उक्तो करता.
3 : गोंयांत ही समस्या चड कित्याक जाणवता?
गोंयांत दर वर्सा सुमार 125 इंचां परस चड पावस पडटा. घांटमाथ्यार हें प्रमाण 150- 175 इंच मेरेन वता. जायत्या रस्त्यांच्या देगेक उदक साचता वा गटारां तुंबतात. देखून डांबर बेगीन पिड्ड्यार जाता.
हाचे भायर,
- पर्यटन हंगामातली जड वाहनांची गर्दी
- ट्रकांची वाहतूक
- जड ट्रक
- सतत रस्ते खणप
हांचोय रस्त्यांचेर व्हड ताण पडटा.
4 : नव्यान केल्ले रस्तेय कांय दिसांनी इबाडटात, अशें कित्याक?
तज्ज्ञांच्या मतान जायते फावट रस्ते दुरुस्तीचीं कामां पावसाळ्याच्या तोंडाचेर ताकतिकेन पूर्ण करतात. डांबरीकरण करतना रस्तो सुको आसप खूब गरजेचें. रस्त्याचेर ओलसाण उरल्यार डांबर सारकें दसना. देखून नव्यान केल्ले रस्तेय बेगीन इबाडटात.
5 : रस्ते खणिल्ल्यान फोंडकुलां वाडटात काय?
हय. उदका पुरवण, वीज, इंटरनेट केबल वा पाइपलायन घालपाक रस्ते परतून परतून खणटात. खणिल्लो भाग मूळ दर्जा इतलो जालो ना, जाल्यार तो कांय म्हयन्यांनी मुंगरता. गोंयांत जायत्या शारांनी अशा खोदकामा उपरांत रस्ते मुंगरिल्ल्याच्यो कागाळी परतून परतून फुडें येतात. थोडे कडेन रस्ते, फुटपाथी वयर सकयल जाल्यात.
6 : सरकाराचो पयसो फुकट
अधिकृत आकडे वर्सानुसार बदलतात; पूण गोंयांत दर वर्सा रस्त्यांची दुरुस्ती आनी डांबरीकरणाचेर कोट्यांनी रुपयांचो खर्च करतात. बांधकाम खात्याक पावसाळ्या आदीं फोंडकुलां पुरोवपाची विशेश मोहीम चालीक लावची पडटा. तरीय पावसाळ्यांत नागरिकांच्यो कागाळी व्हड प्रमाणांत वाडटात. गोंयच्या डांबरीकरणाचो दर्जोय बाबत आसता.
7 : फोंडकुलांक लागून नेमकें नुकसान कितें जाता?
- अपघातांचो धोको वाडटा
- दुचाकीस्वारांक व्हड त्रास जाता
- गाडयांचें लुकसाण जाता
- येरादारी कोंयडी जाता
- इंधनाचा अतिरिक्त खर्च जाता
- प्रवासाचो वेळ वाडटा
गोंयांत पावसाळ्यांत दुचाकी निसरून जावपी अपघातांक फोंडकुलां हें एक म्हत्वाचें कारण. वर्साक तिनशे लोकांक तरी मरण येता.
8 : जाणकार सांगतात
रस्ते अभियांत्रिकी क्षेत्रांतल्या जाणकारांच्या मतान, “फोंडकुलां हो फकत पावसाचो प्रश्न न्हय; तो दर्जा आनी देखभालीचो प्रश्न.” उदकाचो योग्य निचरो, दर्जेदार सामान, स्वतंत्र गुणवत्ता तपासणी आनी खोदकामा उपरांत कडक पुनर्बांदणी नेम लागू केले बगर परिस्थिती बदलची ना, अशें तांचे मत.
गोंयांतल्या फोंडकुलां, फोंड, होंडके, खड्ड्यांचो प्रश्न हो फकत पावसाक लागून जायना. बाबत बांदकाम, अपुरी देखभाल, सदां उठून खणप आनी वाडटी येरादारी हाका लागून ही समस्या गंभीर जाता. मुसळधार पावसाच्या ह्या राज्यांत हवामानाचो विचार करून मजबूत आनी चड काळ तिगपी रस्ते उबारप सामकें गरजेचें.
