गायिका एस. जानकी संवसाराक अंतरली

चेन्नय ः लता मंगेशकर हांणी हिंदी सिनेसृश्ट गाजयली, तशीच दक्षीण भारतीय सिनेमा संगीत विश्व गाजोवपी गायिका एस जानकी (88) काल रातीं संवसाराक अंतरली. तांणी तामिळ, कन्नड, तेलगू, मल्याळम, हिंदी मेळून 48 हजार पदां गायल्यांत. म्हैसूरांत एका खाजगी हाॅस्पिटलांत तांकां मरण आयलें. जानेवारींत तांचे एकुलते पूत मुरलीकृष्ण (65) हांकां मरण आयिल्लें.
लता मंगेशकर ही आपली पयली गुरू मानपी, श्रीस्थला श्रीराममूर्ती जानकी (जानकी अम्मा) हांणी गायनाची आपली विशिश्ट शैली निर्माण केली. आशा भोसले प्रमाण तांणी वेगवेगळ्या शैलींतलीं पदां गायल्यांत. तांकां द. भारतांतली गानकोकीळा म्हणटाले. तांचो जल्म 23 एप्रील 1938 दिसा गुंटूर- आंध्रांत जाल्लो. तांणी शास्त्रीय आनी हेर संगीताचें शिक्षण घेवंक नाशिल्लें. किशोरकुमार प्रमाण तीय स्वयंभू गायिका.
2013 त एस जानकी हांणी पद्मभूषण न्हयकारिल्लो. म्हजें संगीतांतलें योगदान पळयल्यार म्हाका हो पुरस्कार हाचे पयलींच मेळपाक जाय आशिल्लो, अशें कारण तांणी दिल्लें. तांकां चार फावटी राष्ट्रीय चित्रपट पुरस्कार मेळ्ळो. तांणी 33 राज्य चित्रपट पुरस्कार मेळयल्यात. हातूंत विवीध राज्यांतले पुरस्कार आसात, हे विशय. हो विक्रम आतां मेरेन कोणेच मोडूंक ना.
हेमामालिनी, रेखा, श्रीदेवी आनी माधुरी दीक्षित हांचे खातीर एस. जानकी हांणी 1980 च्या दशकांत बरींच हिंदी पदां म्हणल्यात. आर. डी. बर्मन, भप्पी लाहिरी, अनु मलिक, रवींद्र जैन, ए आर रेहमान हांचे वांगडा तांणी हिंदीत काम केलें. 1950, 1960 ह्या दशकांतल्या आदल्या हिंदी पौराणीक सिनेमांनी तांचीं दोन तरी पदां आसतालींच. मात तीं चड गाजूंक नात.
दक्षीण भारतांतलीं जे सिनेमा हिंदींत डब जाले, तातूंत एस जानकी हांचें एक तरी पद आसतालेंच. 22 भारतीय भाशांनी तांणी पदां गायल्यांत. जपानी, सिंहली (श्रीलंका), फ्रेंच, जर्मन आनी इंग्लीश भाशांनीय तांणी गायलां. एस पी बालसुब्रमण्यम हांचे वांगडा तांणी चड गितां गायलीं. कन्नड भाशेंत तांची चड पदां आसात.
एस. जानकी हांचें 1959 वर्सा व्ही कमलाप्रसाद हांचे कडेन लग्न जालें. तांच्या मरणा उपरांत ती हैदराबादाक रावताली. तांच्या मरणाचेर प्रधानमंत्री नरेंद्र मोदी, अभिनेते, कमलासन, रजनीकांत, तामिळनाडूचे मुख्यमंत्री विजय जोसफ हांणी दुख्ख उक्तायलां.

कोंकणी पदां

जिवीत आमचें अशें ह्या 1971 वर्साच्या कोंकणी सिनेमांत तांणी द. भारतीय गायक पी बी श्रीनिवास हांचे वांगडा ल्हारा ल्हारा तारू तुरुतुरू धांवता…, हें पद गायलां. तें मनोहरराय सरदेसाय हांणी बरयलां. ह्याच सिनेमांत तांणी म्हज्या मनांत मोग उदेलां… हें सोबीत गीतूय गायलां.

म्हज्या मनात… लिंक https://youtu.be/war7R2Q0qxY?si=VVFPnKULmnC_CMfS

ल्हारा ल्हारा… लींक https://youtu.be/LXxVJx0_aNM?si=mKq88gVlI1olrmpd

एस जानकी हांचीं कांय हिंदी पदां
मै तेरा तोता तू मेरी मैना, यार बिना चैन कहाँ रे, गोरी का साजन साजन की गोरी, होंगे राम राजा आज, ऊय माँ उय ऊय, सुन रुबिया तुमसे प्यार हो गया, बोल बेबी बोल राॅक अॅण्ड रोल, तुने मेरा दूद पिया, मामला गडबड है, पग पदम संगीत गीत सरगम, दिल मै हो तुम सांसो मे तूम, प्यार तू मुझसे करती हो, गोपाला गोपाला, प्रभू मेरे अवगूण, ओ मारिया.

तांचे हिंदी सिनेमा
सुरसंगम, साहेब, झुठी, मर्द, धर्माधिकारी, आखरी रास्ता, नाचे मयुरी, सत्यमेव जयते, मै तेरे लिए, अव्वल नंबर, हम से है मुकाबला.