कोंकणी भाशिकांक संघटीत करप हो परिशदेचो बरो उपक्रम

शरतचंद्र शणै: सागरांत अखील भारतीय कोंकणी परिशदेचो स्थापणूक दीस

सागर: भारतांत जंय जंय कोंकणी लोक आसात थंय थंय वचून तांकां संघटीत करपाचो एक बरो उपक्रम अखील भारतीय कोंकणी परिशदेन चलयिल्ले खातीर परिशद तोखणायेक पात्र आसा अशें शरतचंद्र शणै हांणी म्हणलें. ह्या वेळार ज्येश्ठ कोंकणी नाटककार आनी साहित्यीक पुंडलीक नारायण नायक हांणी दिल्ल्या योगदाना खातीर माधव मंजुनाथ शानभाग जिणेगौरव पुरस्कार भेटयलो.

अखील भारतीय कोंकणी परिशदेच्या स्थापणूक दिसा निमतान सागर कर्नाटकांतल्या सेंट जोजेफ सभाघरांत काल (आयतारा) आयोजीत केल्ले कार्यावळींत मुखेल सोयरे म्हूण ते उलयताले. ह्या वेळार माचयेर मानाचे सोयरे म्हूण कवी टायटस नोरोन्हा, परिशदेचे कार्याध्यक्ष चेतन आचार्य, भांडारी एच. एम. पेर्नाळ आनी थळाव्यो संयोजक मारिया लिमा हाजीर आशिल्ल्यो.

ह्या वेळार ‘‘भारतीय कोंकणी समाजाचो एकवट’’ ह्या विशयाचेर एक परिसंवाद आयोजीत केल्लो. परिसंवादांत उलयतना सगल्या उलोवप्यांनी सागर म्हालांत कोंकणी भाशेचो प्रचार आनी प्रसार चड प्रभावीपणान करपाचो निश्चेव केलो.

परिसंवादाचे संयोजक अनंत अग्नी हांणी उलयतना सांगलें, येता ते लोकगणटेंत दरेक कोंकणी भाशिकान आवर्जून आपली भाशा कोंकणी म्हूण नमूद करपा खातीर खाशेले यत्न करचे अशी सुचोवणी केली. जेम्स डिसौझा, मोहन शेट, प्रशांत हुलेकल आनी कृष्णमुर्ती वामनाचार हांचोय वांटो आशिल्लो.

ह्या वेळार कोंकणी समाजा खातीर खाशेलें योगदान दिल्ले खातीर व्यंकटेश पै, मोहन शेट, प्रशांत हुलेकल आनी जेम्स पिटर डिसौझा हांचो मुखेल सोयऱ्यांचे हस्तुकीं भोवमान केलो.

आपल्या प्रास्ताविकांत कार्याध्यक्ष चेतन आचार्य हांणी, सागर म्हालांतल्या सगल्या समाजांतल्या कोंकणी भाशिकांचो एकवट तोखणाय करपा सारको आसून कार्यावळ आयोजन करपाच्या तांच्या सहभागा विशीं विशेश आभार मानले. संयोजक मारिया लिमा हांणी उपकार मानले.

ह्या वेळार सागरांतल्या विवीध संस्थांच्यो सांस्कृतीक कार्यावळी आनी गोंयचे कलाकार लक्ष्मण नायक, गायत्री पाटील आनी मनोहर ताम्हणकार हांची संगिताची कार्यावळ जाली. कार्यावळीचें सुत्रसंचाल मनोज फर्नांडीस हांणी केलें.

ही कार्यावळ कोंकणी कॅथॉलीक सभा, दैवज्ञ ब्राह्मण समाज, गौड सारस्वत ब्राह्मण समाज आनी चारोडी कोंकणी आचार समाज सागर हांच्या पालवान आनी गोंय सरकाराच्या राजभाशा संचालनालयाच्या अर्थीक पालवान आयोजीत केल्ली.