गायिका एस. जानकी हांचेर निमाणे संस्कार

म्हैसूर: पार्श्वगायिका एस. जानकी हांचेर काल (आयतारा) सांजवेळा सरकारी इतमामांत निमाणे संस्कार केले. म्हैसूरच्या एका खाजगी हॉस्पिटलांत शेनवारा सांजवेळा जानकी हांकां मरण आयिल्लें. त्यो 88 वर्सां पिरायेच्यो आशिल्ल्यो.

जानकी हांचेर निमाणे संस्कार म्हैसूरच्या एचडी कोटे म्हालांत आशिल्ल्या तांच्या बापायच्या काळा सावन आशिल्ल्या फार्माहावसाचेर तेलगू ब्राह्मण परंपरे प्रमाण केले. सांजवेळा 5.48 वरांचेर तांची नात अप्सरा हिणें तांचे चितेक अग्नी दिलो.

एस. जानकी हांकां शुक्रारा राती स्वास घेवपाक त्रास जाल्लो. उपरांत तांकां हॉस्पिटलांत दाखल केली. थंय तांणी निमाणो स्वास घेतलो.

प्रधानमंत्र्यांनी ओंपली आर्गां

एस. जानकी हांकां आयिल्ल्या मरणान प्रधानमंत्री नरेंद्र मोदी आनी राष्ट्रपती द्रौपदी मुर्मू हांणी दुख्ख उक्तायलें. प्रधानमंत्र्यांनी सांगलें की, एस. जानकी हांच्या आवाजान दरेक भावना सुंदरपणान लोकां मेरेन पावयली.

राष्ट्रपती द्रौपदी मुर्मू हांणी तांकां संगीत जगताचो अनमोल ठेवो अशें म्हणलें.

तामीळनाडूचे मुख्यमंत्री विजय हांणी लेगीत तांच्या मरणान संगीत मळा वेलें केन्नाच भरून न येवपी लुकसाण अशें म्हणलें. जाल्यार अभिनेते रजनीकांत हांणीय तांच्या मरणाचेर दुख्ख उक्तायलें.