लायनमनाक दर म्हयन्याक दितले सुरक्षा उपाय येवजणेचे धडे

पणजी : सुरक्षा विशयक उपकरणांचो वापर आनी शॉक लागपा पसून आपलें संरक्षण करपा विशींचे धडे आतां लायनमनाक दर म्हयन्याक दितले. विभागी पांवड्यार अभियंत्या वरवीं हे धडे दितले. वीज खात्याचे कार्यकारी अभियंते वल्लभ सामंत हांणी ही म्हायती दिली.

वीज लायनीचेर काम करतना लायनमनाक शॉक येवन मरण येवपी खूबश्यो दुर्घटणां घडल्यात. शुक्रारा अस्नोड्यां शॉक लागून लायनमनाक मरण आयलें. हाचे पयलीं पोरूं इन्वर्टराचो रिवर्स करंट येवन दिवचल वाठारांत एका लायनमनाक मरण आयिल्लें. लायनमनाक शॉक लागपाच्या घडणुकांक लागून लायमनां मदीं भिरांत निर्माण जाल्या. शुक्रारा लायनमनाक ग्रावंड पॅट्रोलींग करपाचे निर्देश आशिल्ले. हाका लागून शटडावन घेवंक नाशिल्लो. ग्रावंड पॅट्रोलिंगा वेळार जमनी लागीं आशिल्ले खांदे मारपाच्यो आसतात. तरी लेगीत उंचाये वयले खांदे मारपाक तांणी सुरवात केली, अशी म्हायती अभियंत्यांनी दिली.

लायनीचेर काम करचे पयलीं लायन बंद करप गरजेचें आसता. लायनीचेर करंट येता काय कितें हे विशीं टेस्टर लावन तपासणी सेगीत करची पडटा. टेस्टरान करंट ना हाची खातरजमा केल्या उपरांतूच लायनीर काम करप गरजेचें आसता. ट्रान्सफॉर्मराचेर काम करतना अर्थीग रॉड लावप गरजेचो आसता. हे विशींचें प्रशिक्षण लायनमनाक दिलां, आतां तें सेगीत दितले. तशेंच काम करतना हेल्मेट घालप, हँड ग्लोव्हजचो वापर, योग्य तरेचे निर्दोश टेस्टर वापर हे विशीं लेगीत प्रशिक्षण सेगीत दितले. विभागी वा उपविभागी पांवड्याचेर हें प्रशिक्षण दितले, अशी म्हायती अभियंते वल्लभ सामंत हांणी दिली.

लायनीचेर दुरुस्तीकाम करप वा फॉल्ट सोदप हें काम धोकादायक आसता. पयस रानांत वा पॅट्रोलिंगा वेळार दर खेपे अभियंत्याक रावप शक्य जायना, अशें तांणी सांगलें. लायनमनाक शॉक येवपी घडणुकेची खात्या वतीन चवकशी जातली. चवकशी हो प्रक्रियेचो भाग आसता. सरकारा कडल्यान लेगीत ताच्या कुटुंबीयाक अर्थीक मजत मेळोवन दिवपा खातीर यत्न जातलो, अशें तांणी सांगलें.