एनएमसी कडल्यान एमबीबीएसच्या 50 अतिरिक्त सुवातांक मंजुरी

पणजी : राष्ट्रीय वैजकी आयोगा कडल्यान (एनएमसी) गोंय वैजकी महाविद्यालयांत (जीएमसी) एनबीबीएसच्या 50 अतिरिक्त सुवातांक मंजुरी दिल्या. हाका लागून शिक्षणीक वर्स 2026- 27 सावन प्रवेश तांक 200 वयल्यान 250 विद्यार्थ्यां मेरेन वाडटली. मुख्यमंत्री डॉ. प्रमोद सावंत हांणी ही म्हायती दिली. हे संबंदांत मुख्यमंत्र्यान आयोगाचे उपकार मानल्यात.

मुख्यमंत्र्यान म्हणलें, ह्या म्हत्वपूर्ण विस्ताराक लागून वैजकी शिक्षणाचो हांवेस बाळगुपी विद्यार्थ्यां खातीर, चड करून गोंयांतल्या तरणाट्यां खातीर अदीक संदी निर्माण जातल्यो. ते भायर ह्या निर्णयाक लागून गोंयांतली वैजकी शिक्षण वेवस्था अदीक घटमूट जातली. गोंयांतल्या वैजकी शिक्षण आनी भलायकी सेवेच्यो मुळाव्यो सुविधा घटमूट करपाचे दिशेन सेगीत आदार केल्ले खातीर राष्ट्रीय वैजकी आयोगाचे आमी उपकार मानतात.

2019 आदीं जीएमसींत 180 एमबीबीएस सुवातो आशिल्ल्यो. 2019 त अर्थीक नदरेन दुर्बळ घटकां खातीर 10 टक्के आरक्षण लागू करचे खातीर ह्या सुवातांची संख्या वाडोवन 200 केल्ली. 2023 त भलायकी खातें तशेंच डीन कार्यालयान महाविद्यालयांतली पदवी आनी पदव्युत्तर तांक वाडोवचे खातीर एक व्यापक येवजण तयार केल्ली. गोंयांतल्या तरणाट्यांक उच्च वैजकी शिक्षणा खातीर गोंया भायर वच्चें पडचें न्हय, हे खातीर एमबीबीएसच्या सुवातांनी 25 टक्के वाड करपा वांगडाच सुपर- स्पेशलिटी आनी क्रिटिकल कॅर फांटो सुरू करपाचें सरकाराचें उद्दिश्ट आशिल्लें.

ऑगस्ट 2025 त भलायकी मंत्री विश्वजीत राणे हांणी विधानसभेंत भलायकी विभागाचो हो प्रस्ताव मांडलो. जातूंत सुवातांची संख्या 200 वयल्यान 250 करपाचें प्रस्तावीत आशिल्लें. हो प्रस्ताव राष्ट्रीय वैजकी आयोगा कडेन धाडले उपरांत रोखडीच मुख्यमंत्री डॉ. सावंत हांणी नवी दिल्लींत केंद्रीय भलायकी मंत्र्याची भेट घेतली. हे उच्च पांवड्या वयले बसकेंत मुख्यमंत्री डॉ. सावंत हांणी ह्या 50 अतिरिक्त सुवातांचे मंजुरी प्रक्रियेक गती दिवपाची विनवणी केली आनी गोंयचे भलायकी वेवस्थेक घटसाण दिवचे खातीर हें कितलें म्हत्वाचें आसा, हाचेर भर दिलो. गोंय सरकाराच्या सेगीत फाटपुरवणे उपरांत आनी मुळाव्या सुविधांचे तपासणे उपरांत, एनएमसीन निमाणे येता त्या वर्सा खातीर अधिकृत मंजुरी दिली. ह्या विस्ताराक लागून आतां गोंय वैजकी महाविद्यालय हे दर वर्सा 250 विद्यार्थ्यांची तांक आशिल्लें देशांतल्या मुखेल राष्ट्रीय वैजकी संस्थांचे श्रेणींत आयलां.