गोंय नासणें, उकड्या तांदळाचें

उकड्या तांदळांची पेज जेवन शाळेंत वचपाचे दीस आयज ना. उकडे तांदूळ गोंयकारांच्या जेवणा, खाणांत आसा.

एका तेंपार गोंयांत नासणें, उकड्या तांदळांचो उपेग व्हडा प्रमाणात जातालो. परतून एकदां नासणें, उकड्या तांदळांक म्हत्व येवंक लागलां. नासणें, उकड्या तांदळांतल्यान येणावळ वाडटा ताची जाणवीकाय शेतकारांक जाल्या. नासणें, उकड्या तांदळांत स्वयंपूर्ण जावपाची मोख दवरुया.
फाटल्या पांच वर्सांनी शेतकामाक बळगें दिवपाचे येत्न जाल्यात. शेतकाम म्हाविद्यालय राज्यांत आयलां. त्या म्हाविद्यालयांतल्यान उंचेल्या तांकीचे अधिकारी, शेतकामती गोंयांक मेळपाक जाय. विद्यार्थ्यांक शेतांनी देवन शिक्षण घेवपाक आठवेंतल्यान उर्बा मेळची. सांगें, सत्तरी, केपें, काणकोण, पेडणे म्हालांनी पावस अजून चड पडटा. ह्या तालुक्यांनी शेतां आसात, तीं पडंग आसल्यार सरकारान घेवन पिकावळीचे यत्न करपाची गरज उपरासल्या. सहकार, कंत्राटी, एकवटीत शेतकामापासत येवजण जावचीच. म्हाल पावंड्यार कार्यालयां आसचीं. आयटीआय पावंड्यार रांदपा, वाडपाच्या कुशळतायेचे अभ्यासक्रम आसात. त्या अभ्यासक्रमात परंपरीक खाण जेवण करपाच्यो पद्धती शिक्षणात आसपावच्यो. आधुनिकतायेची जोड दायज अभ्यासक्रमांक मेळूंक येता. नासणें, उकड्या तांदळाचीं खाणां भलायकेक बरीं. हवामानांतले बदल पळोवन नासण्यांचो उपेग खाणा जेवणांनी करचो. विद्यार्थ्यांच्या मदले सुटयेच्या खाणांतय नासणें, उकडे तांदूळ उपेगाक कशे हाडूंक येतात ताचो अदमास घेवचो. नासण्याचें सत्व, पीठ करपी उद्येग गोंयांत आसात. बदल आपणावन ते व्हड जावपापासत खासा अन्न प्रक्रिया उद्येगीक वसणुकेची बांदावळ जावची. उकडे तांदूळ, नासण्यांच्या पिठांतल्यान शेवयो, नुडल्स करुंक येतात.
गोंयच्यो हातावयल्यो शेवयो, पापड करप उणें जायत गेलां. पापड उद्येग देस पावंड्याचे सर्तींत पावल्यात. स्टॅंडर्डायजेशन, व्हरायटी पापड उद्येगांत येता. नासणें, उकड्या तांदळाच्या पीठाचे सांडगे करपाचे घरावे उद्येग गांवगिऱ्या वाठारांत जावपापासत प्रशिक्षण दिवचें.
नासणें राज्यांत हेर राज्यांतल्यान व्हडा प्रमाणात येतात, राज्य नासण्याचे पीकावळीत स्वयंपूर्ण करपाचो दोन वर्सांचो अजेंडा वेंचणुकेंत आसचो. नासण्याचें सत्व आनी पीठ म्हणल्यार कितें, तातूंतल्यान कसले खाण करुंक येता? जेवणात गंवावांगडा नासण्याचो उपेग वाडोवप लाव दिवपी? ती म्हायती दोतोर दिवंक शकतात. दोतोरांकय शाळा, म्हाविद्यालयां मेरेन वचपाक सांगचें पडटलें. कचेरेऱ्यांतल्यान तांकांय पावसांत भायर काडप गरजेचें. दोतोर मदले सुटयेचें खाण कशें आसचें तें बायलांक एकठांय हाडून सांगूंक शकतात.
नासण्याचें सत्व ल्हान भुरग्यांक दितात हाडां घट जावचीं म्हणून. नासण्या पीठाच्यो चपात्यो, भाकऱ्यो गोडेमुताच्या दुयेंतींक बऱ्यो. नासण्याचें सत्व नाल्लाच्या रोसाविणें दूद घालून करपाक जाता. नासण्याचें सत्व आवडना तांकां भाकरी, चपाती खावंक दिवची. नासण्याचे लाडू, इडली, डोसा करतात, नासण्याक मागणी आसा. गंवाच्यो चपात्यो बाजारांत/ दुकानांनी मेळटात, नासण्याच्यो भाकऱ्यो मेळपाची वेवस्था आसची. नासण्याची आंबील गोंयां भायर नखेत्री हॉटेलांनी मेळटा, गोंयांत ती संस्कृताय येवपाची गरज आसा. मैद्याचो उपेग उणो करुन नासण्याचे पाव, उंडे, पोळ्यो करपा पासत प्रशिक्षण दिवचें. नासण्याचे चिप्स, बिस्किटी करतात, प्रमाण वाडोवपाक जाय.
उकड्या तांदळांची पेज जेवन शाळेंत वचपाचे दीस आयज ना. उकडे तांदूळ गोंयकारांच्या जेवणा, खाणांत आसा. उकडे तांदूळ भलायकेक कसो बरो तें मार्गदर्शन जावपाक जाय. उकडो तांदुळ पिकावळींतल्यान चडांत चड जाल्यार देशा भायर गोवा ब्रँड म्हणून तो धाडपाक येता. उकड्या तांदळाचो उपेग मदले सुटयेच्या खाणांत कितलो जाता? पोळे, लाडू, भाकऱ्यो उकड्या तांदळाचे, तांदळाच्या पिठाचे करतात, विद्यार्थ्यांच्या खाणांत सप्तकांत एकदां तांचो आसपाव जावंचो.
तिसवाडी, साश्टी, काणकोण, केप्यां म्हालांत उकड्या तांदळाची पिकावळ वाडोवपापासत भोंवतण आसा? उकड्या तांदळाच्यो शेवयो/ शिरवळ्यो, सान्नां, पुलाव विद्यार्थ्यांक दितात?
नासणें दोंगुल्ल्यो, दोंगराच्या देंवतेर लायतात, दोंगर, दोंगुल्ल्यो तिगल्यार नासण्याची पिकावळ जातली. नासण्यांचे पिकावळी पासत मे म्हयन्यान जागृताय जावची.
नासणें, उकड्या तांदळाची पिकावळ हेर राज्यांनी कशी वाडल्या? परंपरेंतल्या खाणा जेवणात तांचो उपेग कसो जाता? तें शेतकाम खात्याच्या अधिकाऱ्यांनीच न्हय कनिश्ठ कर्मचाऱ्यांक भोंवडी, प्रशिक्षणांतल्यान शिकोवचें. कनिश्ठ कर्मचारी प्रमोशनांतल्यान उंचेल्या पावंड्यार पावतात तेन्ना तांकांय शेतांत देंवन गांवांगांवांनी पळोवणी करपाक कळची. शेतकारा मेरेन हवामानातले बदल पावोवपाक मोबायलाचो उपेग जावचो.
देशांत गोंय पयलींचें शेता भाटांचे राज्य. शिक्षणांतल्यान “व्हायट कॉलर जॉब” तयार जाले, शेतकाम करपी कमी जायत गेले. शेती विद्यालय, म्हाविद्यालय फळ फळावळीचे पिकावळीच्या अभ्यासक्रमाचेर लक्ष दिता. कुळागरां तिगतना शेतांय तिगचीं, नासणें आनी भाताचीं.

सुहासिनी प्रभुगांवकार
9881099260