गोंयांत ‘दांत भलायकी जागृताय’ सक्तीची करात

पंचायतींच्या पांवड्यार नेमान फुकट दांत- चिकित्सा शिबीरां आयोजीत करून थळाव्यांक मार्गदर्शन करप गरजेचें. दांतांची भलायकी ही कुडीच्या हेर अवयवां इतलीच म्हत्वाची.

सद्या गोंयकारांचे भलायकेचेर साबार संकश्टां आयल्यांत, पूण तातूंत दांतांचे भलायके कडेन सगळ्यांत चड आडनदर जाता. दांतांचें दुखणें असह्य जाय मेरेन चडशे लोक दांतवैद्यां कडेन वचनात. हाका दोन मुखेल कारणां आसात. पयलें म्हणल्यार दांतांचे भलायके विशीं जागृतायेचो उणाव आनी दुसरें म्हणल्यार म्हारग दांतचिकित्सा. ह्या दोनूय गजालींक लागून गोंयकारांची दांतांची भलायकी धोक्यांत आयल्या.

आयज गोंयांत गांवा-गांवांनी खाजगी दंत चिकित्सालयां उक्तीं जावपाक लागल्यांत, पूण थंयचे मोल सामान्य गोंयकाराच्या आवाक्या भायर आसता. सादो दांत काडप, ‘रूट कॅनल’ करप वा दांतांक ब्रेसीस घालपा खातीर हजारांनी रुपयांची फी आकारतात. दांत किडल्यार वा दुखल्यार सरकारी हॉस्पिटलांनी गर्दी पडिल्ली आसता, देखून लोक खाजगी क्लिनिकांत वचप पसंत करतात, पूण थंयची म्हारगाय पळोवन उपचार अर्द्यारूच सोडटात. भुरग्यांच्या दांतांचे उपचार लेगीत सामान्यांकाय चड म्हारग आसात. हाका लागून गरीब आनी मध्यमवर्गीय लोक दांतांच्या गंभीर दुयेंसांक बळी पडटात.

दुसरें म्हणल्यार, दांतांची जतनाय कशी घेवची हाचे विशीं आमकां मुळावी म्हायतीच नासता. फकत दांत ब्रश करप म्हणल्यार दांतांची भलायकी न्हय. गोड खावप, पान- तंबाखू वा चुकीच्या पद्धतीन दांतांची घेतिल्ली जतनाय हांकां लागून दांतांचे आनी हिरड्यांचे गंभीर प्रस्न निर्माण जातात. हे विशीं मुळाव्या पांवड्यार जागृताय करपाची गरज आसा. चडशा लोकांक ‘ओरल हायजीन’ म्हणल्यार कितें हेंच खबर ना.

ह्या प्रस्नाचेर मात करपा खातीर सरकारान आनी भलायकी खात्यान रोखडींच पावलां उखलपाची गरज आसा. पयलें म्हणल्यार, राज्यांतल्या सगळ्या शाळांनी आनी शिक्षणीक अस्थापनांनी ‘दांत भलायकी जागृताय’ सक्तीची करपाक जाय. भुरगेपणांतूच दांतांचें म्हत्व समजलें, जाल्यार फुडारांतले प्रस्न उणे जातले. दुसरें आनी सगळ्यांत म्हत्वाचें म्हणल्यार, खाजगी दांतवैद्यांचे फीचेर सरकारान नियंत्रण हाडपाक जाय. मुळाव्या आनी सामान्य उपचारां खातीर एक थारावीक फी मर्यादा निश्चित करपाक जाय.  जाका लागून सामान्य मनशाकय हे उपचार घेवप शक्य जातलें.

पंचायतींच्या पांवड्यार नेमान फुकट दांत- चिकित्सा शिबीरां आयोजीत करून थळाव्यांक मार्गदर्शन करप गरजेचें. दांतांची भलायकी ही कुडीच्या हेर अवयवां इतलीच म्हत्वाची. तिका म्हारग फी आनी अज्ञानाच्या काळखांत दवरल्यार, गोंयकारांच्या फुडाराचेर ताचो वायट परिणाम जातलो. भलायकी खात्यान ह्या विशयाचेर गांभीर्यान विचार करून रोखडीच कृती करची.

- प्रा. जयेश अर्जुन राऊत