दत्ता नायक हांचो राजिनामो स्वीकारचे नात : कोंकणी भाशा मंडळ

पणजी: साहित्यीक, उद्देजक दत्ता दामोदर नायक हांणी दिल्लो मंडळाच्या प्राथमीक वांगडीपणाचो राजिनामो स्वीकारप ना असो निर्णय कोंकणी भाशा मंडळान एकमतान घेतला.
बिरेस्तारा 9 जुलयाक जाल्ले मंडळाच्या कार्यकारिणी बसकेंत हो निर्णय घेतला. कोंकणी चळवळ उबी करपा खातीर नायक हांणी केल्ल्या मोलादीक वावराचो आदर दवरूनच हो निर्णय घेतला अशें मंडळाचे अध्यक्ष सेराफीन काॅता हांणी म्हणलां. तांचें चळवळींतलें योगदान हो आमच्या सामुहीक प्रवासाचो अविभाज्य वांटो आनी कोंकणी चळवळीचें कार्य फुडें व्हरपा खातीर तांचो वांगड गरजेचो अशेंय पत्रकांत फुडें म्हणलां.
वेगवेगळ्या मुद्यांचेर मतभेद आसप हें साहजीक आसा, मात ताचें रुपांतर मनभेदांत जावचें न्हय अशें मत कॉता हांंणी उक्तायलां. उलट मतभेदांचेर उक्त्या मनान भासाभास करप आनी तातूंतल्यान एकवट साधप होच तर कोंकणी चळवळींतल्या लोकशाय प्रणालीचो प्राण जावन आसा. देखून कोंकणीची संघर्शमय चळवळ उबारपा खातीर मोलादीक योगदान दिलां. एका म्हालगड्या कार्यकर्त्याक फकत मतभेदांक लागून पयस करप भाशा मंडळ केन्नाच मान्य करचें ना, अशेंय तांणी मुखार म्हणलें.
नायक हांणी कोंकणी भाशा मंडळाक दिल्ली देणगी फाटीं घेवप हो पुरायपणान तांचो वैयक्तीक निर्णय. तांच्या ह्या निर्णयाचो आपूण मनाकाळजा थावन आदर करतां आनी ताचेर कांयच भाश्य करपाक सोदिना. आमची मोख फुडले वाटचालीचेर आसा आनी कोंकणी चळवळीच्या ह्या अखंड वाटचालींत नायक हांचो हाचे फुडेंय वांगड आसतलो अशी आस्त काॅता हांणी उक्तायल्या.