'होवयो: इकोज ऑफ द पास्ट' म्हायतीपटाची टागोर फिल्म अवॉर्ड्सांत निवड

पणजीः गोंयकार तनीषा पवार हांणी दिग्दर्शीत केल्लो 'होवयो: द इकोज ऑफ द पास्ट' ह्या गोंयच्या पारंपारीक तोंडावळ्या लोकगीतांचो आनी तांच्या सांस्कृतिक म्हत्वाचो अभ्यास करपी चित्रपटाची इंटरनॅशनल टागोर फिल्म अवॉर्ड्स खातीर कोलकात्यांत अधिकृत निवड जाल्या.
कोलकातांत आशिल्ले इंटरनॅशनल टागोर फिल्म अवॉर्ड्स संवसारभरांतल्या स्वतंत्र चित्रपट निर्मितीचो उत्सव करता आनी फीचर फिल्म, शॉर्ट फिल्म, डॉक्युमेंटरी आनी हेर विभागांत उत्कृश्ट कामगिरीची दखल घेता.
हो डॉक्युमेंटरी चित्रपट म्हापशेंच्या सेंट झेवियर्स कॉलेजीच्या निमण्या वर्साच्या प्रकल्पा रुपान तयार केलो. तनीषा पवार हांणी ह्या चित्रपटाची लेखिका, संशोधक आनी दिग्दर्शिका म्हूण काम केलां. निर्मिती पंगडांत मनोज राठोड, लौकिक अवसारे आनी वैभवी जोशी हांचो आस्पाव आसा. हांचेनी छायाचित्रण, संपादन आनी निर्मिती प्रक्रियेच्या वेगवेगळ्या भागांत योगदान दिलां.
हो चित्रपट गोंयची परंपरा 'होवयो' जतन करपाचेर आदारीत आसा. लग्न सुवाळो आनी दिसपट्टे जिणेंत पारंपारीक रितीन हीं गीता गावपाची परंपरा आसा. क्षेत्रीय संशोधन, तज्ञांच्यो मुलाखती आनी लोककलाकारांच्या नोंदींच्या माध्यमांतल्यान ह्या डॉक्युमेंटरीन अनोख्या परंपरेचें सांस्कृतिक, सामाजिक आनी ऐतिहासिक म्हत्व दाखयलां आनी ती फुडल्या पिळगे खातीर जतन करपाची गरज आशिल्ल्याचे सांगलां.
हे विशीं उलयताना तनीषा पवार हांणी सांगलें, "ह्या प्रकल्पाची दिग्दर्शिका म्हूण, ही निवड गोंयच्या अमुर्त सांस्कृतिक वारशाक आनी ती जिवी दवरपी आवाजांक उजवाडाक हाडपांत एक अभिमानाचो टप्पो आसा."
आंतरराष्ट्रीय माचयेर चित्रपटाची जाल्ली ही निवड तरणाट्या सर्जनशील पंगडा खातीर एक म्हत्वाची कामगिरी आसा आनी गोंयच्या सांस्कृतिक वारशांत रुजिल्ल्या कथांक मेळपी वाडत्या मान्यतेचें प्रतिबिंब आसा. तनीषा पवार सिनेमा वरवीं राज्याच्या समृध्द सांस्कृतिक परंपरांचें दस्तावेजीकरण, जतन आनी उत्सव करतात आनी थळाव्या कथांक जागतीक प्रेक्षकां मेरेन पावयतात.