बनावट प्रमाणपत्र- दोग अधिकारी दोशी

पणजी : बनावट प्रमाणपत्र सादर करप प्रकरणांत दक्षता संचालनालयान केल्ल्या मुळाव्या चवकशेंत दोग अधिकारी दोशी आढळल्याची म्हायती सरकाराच्या सूत्रां कडल्यान मेळ्ळी. फुडल्या कारवाये विशींची फायल सरकारा कडेन प्रलंबीत आसा. दोगांयनी सादर केल्ल्या प्रमाणपत्रांमदी फेरफार आशिल्ल्याचे मुळाव्या चवकशेत दिसून आयला.

दक्षता संचालनालया कडेन कनिश्ठ सेवा अधिकारी आनी कामगार खात्याच्या अधिकाऱ्या आड कागाळ आयिल्ली. कनिश्ठ सेवा अधिकाऱ्यान नोकरे खातीर बोगस इडब्लूएस प्रमाणपत्र सादर केल्ल्याची कागाळ आशिल्ली. कामगार खात्याच्या अधिकाऱ्या आड बोगस पदवीची प्रमाणपत्र सादर करपाविशी कागाळ आयिल्ली. दक्षता संचालनालयान संबंदीत अधिकाऱ्यांची बाजू आयकून घेवन मुळावी चवकशी पुराय केल्या. चवकशेचो अहवाल सरकाराक सादर केला. कामगार खात्याच्या अधिकाऱ्याविशीची फायल कामगार मंत्र्यां कडेन जाल्यार कनिश्ठ सेवा अधिकाऱ्याची फायल मुख्यमंत्र्यांच्या कार्यालयांत प्रलंबीत आसा. संबंदींत अधिकाऱ्यांनी खोलायेन चवकशी करप वा तांचेर कारवाय करपाविशींचो निर्णय सरकाराचेर निंबून आसा. कागाळी प्रमाण दक्षता संचालनालयान मुळावी चवकशी करून अहवाल सादर केला, अशी म्हायती गोपांनी दिल्या.

अर्थीक नदरेन मागास गटा खातीर (इडब्लूएस) सरकारी नोकऱ्यां मदीं राखीव कोटा आसता. कनिश्ठ सेवा अधिकारी (जेएसओ) पदा खातीर एका उमेदवारान इडब्लूएस गटा खातीर आशिल्ल्या राखीव पदा खातीर अर्ज केलो. परिक्षा उत्तीर्ण जावन गुणवत्ता वळेरेंत सुवात मेळिल्ल्यान ताची पदा खातीर निवड जाली. ताची मालमत्ता पळयल्यार तो इडब्लूएस गटा खातीर पात्र थारना, अशी कागाळ दक्षता संचालनालया कडेन आयली. ताचे बापायच्या नांवार शेत जमीन तशेंच हेर बरीच मालमत्ता आशिल्ल्याचे चवकशे उपरांत दिसून आयलें. हाका लागून चुकीची म्हायती सादर करून ताणें इडब्लूएस प्रमाणपत्र घेतिल्ल्याचे मुळाव्या चवकशेंत दिसून आयला. इडब्लूएस गटा खातीर कोण पात्र थारता, हे प्रमाणपत्र कोणाक दिवचें, हे विशींचे निकश सरकारान स्पश्ट केल्या. ह्या निकशांत कनिश्ठ सेवा पदा खातीर निवड जाल्लो उमेदवार बसना. हाका लागून ताणें सादर केल्ले प्रमाणपत्र बोगस थारता.

कामगार खात्यांत 35 वर्सां पयली नियुक्त जाल्ल्या एके कर्मचाऱ्यान पदवीचे प्रमाणपत्र सादर करून अधिकारी पदा मेरेन बडटी मेळयली. ताणे सादर केल्ले पदवीचें प्रमाणपत्र बोगस आशिल्ल्याची कागाळ दक्षता संचालनालया कडेन आयली. संबंदीत अधिकारी सेवेंत दाखल जाल्लो तेन्ना तो पदवीधर नाशिल्लो. कालांतरान ताणें पदवी मेळयली. पदवीचें प्रमाणपत्र सादर केल्या उपरांत अणभवाच्या आदारान ताका अधिकारी पदाचेर बडटी मेळ्ळी. दक्षता संचालनालयान ताच्या शिक्षणीक प्रमाणपत्राची तपासणी केली. ताणें ज्या विद्यापिठाचे पदवी प्रमाणपत्र सादर केला, त्या विद्यापीठाक पत्र बरोवन विचारणा लेगीत केली. विद्यापीठा कडल्यान कसलीच जाप येवंक ना. ताणे बडटी खातीर सादर केल्ली शिक्षणीक प्रमाणपत्रां वैध स्वरूपाची नात, असो मुळाव्या तपासाचो निश्कर्श आसा.

बनावट प्रमाणपत्रांच्या आदारे नोकरी मेळोवप वा सरकारी नोकरेत बडटी मेळोवप हो गंभीर प्रकार आसा. सरकार वा संबंदींत मंत्र्यांनी आदेश दिल्या उपरांत कारवायेची फुडली प्रक्रिया जातली.