कार्यालयांनी बसून न्हय शेतांत देंवून काम करात: मुख्यमंत्री

शेतांत देंवनाशिल्ल्या ट्रॅक्टर चालकाच्या निलंबनाचे आदेश

पणजी : विभागी शेतकी अधिकार्‍यांनी कार्यालयांत बसून न्हय तर शेतांत देंवून काम करपाक जाय. शेतांत वचून शेती पळोवणी करपा सयत तांणी पंचायतींनी शेतकारांच्यो बसका घेवन तांच्यो समस्या सुटाव्यो करच्यो असो उलो मुख्यमंत्री डॉ. प्रमोद सावंत हांणी मारलो. शेतांत देंवनाशिल्ले ट्रॅक्टरचालक आयजूच निलंबीत जातले, अशें आस्वासन तांणी दिलें.

सांखळें रवींद्र भवनांत मंगळारा कृशी पे चर्चा कार्यावळ जाली. हे कार्यावळींत मुखेल सोयरे म्हूण मुख्यमंत्री उलयताले. आमदार डॉ. चंद्रकांत शेट्ये, आमदार प्रेमेंद शेट, शेतकी संचालक चंद्रहास नायक तशेंच हेर मानेस्त हाजीर आशिल्ले.

विकसीत भारत, तशेंच विकसीत गोंयचे सपन शेतकारां बगर पुराय जावंक शकना. हाका लागून शेतीचें प्रमाण वाडपा सयत शेतकारांक आदार दिवपाची गरज आसा. गोंय सरकारान स्वयंपूर्ण गोंय मोहीम सुरू केल्या. हे मोहीमेक लागून शेती तशेंच भाजयांचें उत्पादन वाडपाक लागलां.

फाटल्या सात वर्सांत शेतीचें प्रमाण वाडपा सयत शेतकारां खातीर विवीध सवलती सुरू जाल्या. ट्रॅक्टर चालकाची शेतांत देंवपाची तयारी ना. तो बसून रावता, अशी कागाळ आतांच म्हजे कडेन आयली. तांचें नांव सांगले उपरांत आयजूच हांव ताका निलंबीत करतां, अशें आस्वासन मुख्यमंत्र्यांनी दिलें.

गोंयांत 18 हजार हॅक्टर खाजन शेती आसा. ही शेती पुनरूज्जीवीत करपाचो प्रस्ताव आसा. संवसारीक बँक आनी केंद्र सरकाराचे मजतीन गोंय सरकार खाजन शेती पुनरूज्जीवीत करपी आराखडो तयार करतले.

शेतकी खात्याचे कांय ट्रॅक्टर चालक मुद्दाम ट्रॅक्टर मोडून घालतात आनी बसून रावतात. हे प्रकार सोंसून घेवचे नात. ह्या प्रकारांचेर कारवाय जातली. शेतकारांक ट्रॅक्टर घेवपा खातीर सरकार 90 टक्क्यां मेरेन अनुदान दिवपाची सरकाराची तयारी आसा. अर्ज केले उपरांत 15 दिसां भितर ट्रॅक्टरां खातीर अनुदान मेळटलें. एकल्यान शेती करप परवडना, म्हूण शेतकारांनी एकठांय येवन फार्मर्स क्लब स्थापन करपाक जाय. एकठांय आयले उपरांत शेती करप सोपें आनी लावकारी जाता, अशें मुख्यमंत्र्यांनी सांगलें.

शेतकारां खातीर तरेकवार येवजण्यो सुरू जाल्या. हाचे फुडें लेगीत त्यो सुरूच उरतल्यो. आयज लेगीत 80 टक्के फणस फुकट वता. फणस फुकट वचपाचें प्रमाण उणें जावपाक जाय. तशेंच अंदूं सावन बांबू आनी हळदीचे लागवडीक सरकार उर्बा दितलें. हळद तशेंच बांबू सावन बरी येणावळ मेळप शक्य आसा.

बागायती तशेंच शेत करप लावकारी जावचें हाचे खातीर सरकारान आदारभूत रक्कम दिवप सुरू केलां. भाजी उत्पादकां खातीर सरकारान 8 कोटी रूपया खर्च केल्यात. शेतकारां खातीर लुकसाण सोंसपाची सरकाराची तयारी आसा, अशें मुख्यमंत्र्यांनी सांगलें.