कुळ्यां दोगां जाणांक बुडून मरण

फाटल्या 9 दिसांत कुळ्यां न्हंयेंत 6 बळी

फोंडेंः तांबडीमळ - कुळ्यां काल (आयतारा) सकाळीं दुदसागर न्हंयेचेर न्हावपाक गेल्ले ओंकार डेंडीन (17) आनी सागर डेंडीन (17) ह्या दोगांक मरण आयलें. मजगतीं, 13 जूनाक मेटावाडो - कुळ्यां 4 तरणाट्यांक बुडून मरण आयिल्लें. बागलकोट - कर्नाटक हांगा शिक्षण घेवपी दोगूय तरणाटे 4 - 5 दिसां आदीं कुळ्यां आयिल्ले. फक्त 9 दिसांत वट्ट 6 जाणांक मरण आयिल्ल्यान ह्या वाठारांत लोक हळहळ उक्तायतात. कुळें पुलिसांनी घडणुकेचो पंचनामो करून कुडी मडगांवचे मड्याकुडींत दवरल्यात.

थळाव्या लोकांनी दिल्ले म्हायती प्रमाण आयतारा सकाळीं ओंकार डेंडीन हो आपलो सोयरो आशिल्ल्या सागर डेंडीन आनी ल्हान भावा वांगडा लागींच आशिल्ल्या खेळांमळार खेळूंक वतां म्हणून आवयक सांगून गेल्लो. पूण ते तिगूय न्हंयेचेर गेले. ओंकार डेंडीनाच्या ल्हान भावान उदकांत देंवुया म्हणून सांगलें. ते दोगूय रोखडेच कर्नाटकांत वचपाचे आशिल्ल्यान तांणी न्हावपाचो निर्णय घेतलो. पूण तांकां न्हंयेच्या उदकाचो अदमास आयलो ना. ते बुडले. न्हंयेचे देगेर आशिल्ल्या ओंकार डेंडीनाच्या ल्हान भावान बापायक फोन करून आदारा खातीर आपयलें. तांणी लोकांक आनी पुलिसांक कळयलें. दोगांयकूय उदकांतल्यान भायर काडून 108 तल्यान मुळाव्या भलायकी केंद्रांत घाले पूण तपासणी करतकच दोतोरांनी तांकां मरण आयिल्ल्याचें सांगलें. कुळें पुलीस घडणुकेचो पंचनामो करतात.

ओंकार डेंडीनाचें कुटुंब फाटलीं कांय वर्सां कुळ्यां रावता. सागर डेंडीनाचें कुटुंब बागलकोटांत रावता. ओंकार डेंडीनाक शिक्षणा खातीर मूळ गांवांत बागलकोटांत दवरिल्लो. ओंकार डेंडीन हो आयटीआय जाल्यार सागर डेंडीन हो वेवसायीक फांट्यांत शिक्षण घेतालो. मेटावाडो - कुळ्यां 13 जूनाक न्हंयेंत बुडून चार जाणांक मरण आयिल्लें. ही घडणूक ताजी आसतनाच आयतारा दुसरे घडणुकेंत दोगांक मरण आयिल्ल्यान वाठारांतले लोक हळहळ उक्तायतात.

मजगतीं, मेटावाडो हांगा दनपरां वाहनां घेवन आयिल्ले पर्यटक न्हंयेंत देंविल्ले. तांकां पुलिसांनी धांवडायले. धारबांदोडें म्हालाचे उपजिल्होधिकारी अमितेश शिरवयकार हांणी न्हंयेच्या विवीध वाठारांनी धोको दाखोवपी तकटे लायल्यात.