सुर्ला बाराजण घसघशार बेळगांवचो तरणाटो बुडलो

काळोख जाल्ल्यान आयज परतून सोदमोहीम

वाळपय: काल (आयतारा) सांजवेळा सुर्ला हांगासरल्या बाराजण घसघशार बेळगांवचो 20 वर्सां पिरायेचो तरणाटो बुडिल्ल्याची दुर्दैवी घडणूक घडली. उटंगाराच्या पावसाक लागून उदकाचो प्रवाह अचकीत वाडिल्ल्यान तरणाट्याचो सोद घेवपाक रातीं उसरां यत्न केले. पूण काळोख आनी उदकाच्या प्रवाहाक लागून सोदमोहीम स्थगीत केली. आयज (सोमारा) परतून एकदां सोद मोहीम हातांत घेतले अशी म्हायती अधिकाऱ्यांनी दिली.

मेळिल्ले म्हायती प्रमाण सत्तरी म्हालांतल्या ठाणें ग्रामपंचायत वाठारांतल्या सुर्ला गांवां कुशीक म्हादय अभयारण्य वाठारांत आशिल्ल्या बाराजण घसघशार आयतारा दनपारां बेळगांव सावन कांय तरणाटे न्हावपा खातीर आयिल्ले. घांटमाथ्यार दीसभर उटंगाराचो पावस सुरू आशिल्ल्यान घसघशाच्या उदकाचो प्रवाह व्हड प्रमाणांत वाडिल्लो. त्याच वेळार उदकांत देंविल्ल्यान आदित्य दीपक कुमार सतपती (20) हो तरणाटो उदकांत तोल वचून खोल उदकांत बुडलो.

ताच्या इश्टांनी ताका वाटावपा खातीर खर यत्न केले. पूण उदकाचो प्रवाह नेटाचो आनी खोल आशिल्ल्यान तांकां येस आयले ना. घडणुकेची म्हायती मेळटकच वाळपय उजो पालोवपी दळाक आपयलें.

दळाचे जवान रोखडेच दाखल जाले. तांचे सयत म्हादय अभयारण्याचे कर्मचारी, वाळपय पुलीस, थळावे नागरीक तेंच आपवावुरप्यांनी सोदकार्य सुरू केलें. पूण सेगीत पडत आशिल्ल्या पावसाक लागून आनी घसघशाच्या वाडट्या प्रवाहाक लागून सोदमोहीम कठीण जाली.

मजगतीं, घडणुकेची गंभीरताय लक्षांत घेवन बेळगांव सावन नौदळाच्या प्रशिक्षीत जवानांकूक घडणूक थळार आपोवन घेतलो. तांणी लेगीत सांजवेळ मेरेन सोदकार्य केलें. पूण काळोख पडिल्ल्यान आनी उदकाची गती वाडिल्ल्यान सोदकार्य मुखार सुरू दवरप घातक थारत आशिल्ल्यान रातीं उसरां मोहीम थांबयली. सोमारा सकाळीं पतून एकदां नौदळ, उजो पालोवपी दळ, पुलीस, रान विभाग आनी थळाव्यांचे मजतीन जोड सोदमोहीम राबयतले.

म्हायती प्रमाण आदित्य कुमार सतपती हो मूळ ओडिशा राज्यांतलो आसून ताचे कुटुंब सद्या बेळगांवां राबित्याक आसा. ताचो बापूय निवृत्त नौदळ अधिकारी आशिल्ल्याचें समजता. इश्टां बराबर पावसाळी पिकनिके खातीर तो सुर्ला घसघशार आयिल्लो. घडणुकेची म्हायती मेळटकच ताच्या कुटुंबा सयत बेळगांवच्या खूबशा नागरिकांनी घडणूक थळार धांव घेतली.