तळपणां अपघातांत एकल्या भुरग्याक मरण, दुसरो जखमी

पैंगीणः तळपणां काल (आयतारा) जाल्ल्या एका वाहन अपघातांत काणकोणच्या खोला, काजुमोळ हांगासरल्या 17 वर्सांच्या ॲफ्टन फर्नांडीस ह्या तरणाट्याक मरण आयलें. जाल्यार, ह्याच अपघातांत गाडयेंतलो दुसरो प्रवासी, आगोंदाचो 19 वर्सांचो मयंक पागी हो गाडयेंतल्यान भायर पडिल्ल्यान किरकोळ जखमी जालो.

काणकोण पुलिसांनी दिल्ले म्हायती प्रमाण, हे दोगूय वांगडा GA-08-R-6353 क्रमांकाचे किया मोटारीन प्रवास करताले. ते चार-रस्ता, काणकोण सावन बायपास हायवे 66 मार्गान पोळें वटेन वताले. तळपणां लागीं पावले उपरांत, कार चालकाचें गाडये वयले नियंत्रण सुटलें आनी गाडी रस्त्या वेल्यान निसरून दोन मिटर खोल शेतांत कोसळ्ळी. अपघात इतलो भिरांकूळ आशिल्लो की, चालकाक गाडयेंत अडकून आक्ताक मरण आयलें.

कांय लोकांनी अपघात जाल्लो पळोवन पुलिसांक खबर दिली. तांचे उपरांत जखमी आनी मरण आयिल्ल्याक काणकोणच्या सामुदायीक भलायकी केंद्रांत हाडले, थंय दोतोरांनी चालकाक मरण आयिल्ल्याचें जाहीर केले. दुसऱ्या जखमी प्रवाशाक उपचारां खातीर मडगांव हलयलाे.

पंचनामाे केले उपरांत, वैजकी-कायदेशीर सोपस्कारां खातीर कूण मडगांवच्या दक्षीण जिल्हाे हॉस्पिटलांत दवरल्या. पुलिसांनी मोटार वाहन कायद्या खाला अपघाताचो गुन्यांव नोंद केला. निरिक्षक प्रवीण गांवस हांच्या मार्गदर्शना खाला उपनिरिक्षक विशाल वेळीप फुडलो तपास करतात.