मुख्यमंत्र्यां उपरांत देविया राणे, जीत आरोलकार जल्मदीस मनोवचे नात

पणजी : पहलगामांत जाल्ल्या आतंकवादी हल्ल्याक लागून मुख्यमंत्री डॉ. प्रमोद सावंत हांणी बिरेस्तारा आपलो जल्मदीस मनयलो ना. जल्मदिसा निमतान फकत सेवाभावी कार्यावळी जाल्यो. मुख्यमंत्र्यां उपरांत आमदार देविया राणे, जीत आरोलकार हांणी लेगीत जल्मदिसाच्यो कार्यावळी रद्द केल्या. केरळाचे राज्यपाल राजेंद्र आर्लेकार हांणी लेगीत जल्मदीस मनयलो ना.

मंगळारा पहलगामांत जाल्ल्या आतंकवादी हल्ल्यांत 28 जाणाक मरण आयलें. ह्या हल्ल्याक लागून पुराय देश दुख्खात आसा. हल्ल्याचो निशेध आनी दुख्खाक लागून मुख्यमंत्री डॉ. प्रमोद सावंत हाणी खंयच्याच भौशीक कार्यावळींनी वांटो घेतलो ना. जाहीरपणान लोकांचीं परबीं लेगीत तांणी घेवंक ना. सांखळे रवींद्र भवनांत जाल्ल्या भलायकी शिबिराक मात तांणी भेट दिली.

पर्येच्यो आमदार देविया राणे हांचो आयज जल्मदीस. जल्मदिसा निमतान कार्यावळींचे आयोजन करचे न्हय, अशे आवाहन तांणी केला. जल्मदिसाची पार्टी वा जाहीर कार्यक्रम जावचो ना. मांद्रेंचें आमदार जीत आरोलकार हांचो 30 मे दिसा जल्मदीस आसा. ते लेगीत जल्मदिसाची कार्यावळ जाहीरपणान मनोवचे नात.

केरळाचे राज्यपाल राजेंद्र आर्लेकार हांचो 23 एप्रीलाक जल्मदीस जालो. तांणी लेगीत जल्मदिसाचीं कसलीच कार्यावळ आयोजीत केली ना. परबीं लेगीत तांणी घेवंक ना, अशी म्हायती तांणी दिली.

काजू महोत्सव 25 एप्रील सावन सुरू जावपाचो आसलो. पहलगाम हल्ल्याक लागून तो फुडें धुकल्ला.

शिवोलेची आमदार डिलायला लोबो हांणी मात जल्मदिसा निमतान पार्टी केली. डिलालया लोबो सोडल्यार हेर कोणीच जल्मदिसा निमतान पार्टी करूंक ना. तशेंच मुख्यमंत्री डॉ. प्रमोद सावंत हांच्या जल्मदिसा निमतान आमदार संकल्प आमोणकार हांणी मात केक कापपाची कार्यावळ केली.