‘पुस्तकाचे मनशा कडेन इश्ट, तत्वज्ञ आनी मार्गदर्शकाचें नातेंः राजेंद्र आर्लेकार

पणजीः ‘पुस्तकाचे मनशा कडेन इश्ट, तत्वज्ञ आनी मार्गदर्शकाचें नातें आसता’ अशें मत केरळ राज्याचे राज्यपाल राजेंद्र आर्लेकार हांणी केरळांतल्या एर्नाकुलम हांगाच्या भारत हॉटेलांत साहित्य अकादमी, नवी दिल्ली आनी पी.जी. कामत फावंडेशनाच्या सहकार्यान आयोजीत केल्ल्या ‘लोक आनी पुस्तकां’ ह्या उपक्रमात उक्तायले.

सुमार 55 मिणटांच्या भाशणांत आर्लेकार हांणी कॉलेजीच्या काळांतल्यो कांय घडणुको सांगल्यो. जातूंत म्हाविद्यालयाचे ग्रंथपाल विजय हजारे हांणी वाचपाची आवड आपल्या भितर रुजयली. ताणें श्री. एम. सी. छगला (रोझीस इन डिसेंबर), गो. नि. दांडेकर (यादस्तीका), गोपाळकृष्ण पै (कन्नडांतल्यान भाशांतरीत मराठींतले स्वप्न सारस्वत), राजीव मल्होत्रा (ब्रेकिंग इंडिया अँड स्नेक्स इन गंगा) आनी हेर जायत्या पुस्तकांचाे उल्लेख आपल्या भाशणात केलाे.

आवय-बापायन आपल्या भुरग्यांक ल्हान पिरायेचेर वाचपाची संवय लावची अशें तांणी आपलें भाशण सोंपयतना सांगलें. पुस्तकां उजवाडावप आनी वाचपी लोक हांचे मदलो समन्वय म्हत्वाचो अशें तांणी सांगलें.

साहित्य अकादमीचे सचीव डॉ. के. श्रीनिवासराव हांणी राज्यपालाक येवकार दिलो. उपकाराचें उलोवप पी. जी. कामत फावंडेशनाचे आनंद कामत हांणी केले. साहित्य अकादेमीचे कोंकणी भास सल्लागार मंडळ समन्वयक आनी नामनेचे कवी मेलविन रॉड्रिगीस माचयेर हाजीर आशिल्ले. कार्यावळीचें सुत्रसंचालन अनंत अग्नी हांणी केलें.