फोंडें पालिका इमारतींतल्या विक्रेत्यांक मुख्यमंत्र्यांची थाकाय

-चवथी उपरांत दुकानां स्थलांतरीत करपाचे आस्वासनफोेंडेंः दुकानां स्थलांतरीत करपाचो आदेश दिल्ल्या फोंडा नगरपालिका इमारतींतल्या दुकानदारांक थाकाय मेळ्ळ्या आनी मुख्यमंत्र्यान दिल्ल्या आश्वासना प्रमाण आतां चतुर्थी उपरांतच दुकानां स्थलांतरीत करतले.

सविस्तर अहवाला प्रमाण धोक्याचे जाल्ल्या पालिका इमारतींतल्या विक्रेत्यांक सोमारा 72 वरां भितर दुकानां रिती करपाचो आदेश प्रशासनान दिल्लो. गणपती विसर्जन मेरेन तरी दुकानदारांनी आपूण आसा थंयच रावपाची विनवणी वेपाऱ्यांनी केल्ली. पूण प्रशासन आपल्या थुमिकेचेर ठाम आशिल्ल्यान निमाणे आयतारा विक्रेत्यांनी साखळींत मुख्यमंत्र्यांची भेट घेतली. ह्या वेळार मुख्यमंत्र्यानी विक्रेत्यांचें म्हणणें आयकून तांकां तात्पुरती थाकाय दितनाच चवथी उपरांतच दुकानां स्थलांतरीत करतले अशें आश्वासन दिलें.

सांखळींत गेल्ले विक्रेते बपरतून फोंड्यां पावले उपरांत वेपारी संघटनेचे अध्यक्ष घारू सावंत हांणी चड म्हायती दितना सांगलें, हे इमारतींतले दुकानदार फकत चतुर्थी आनी हेर उत्सवांनीच चड वेवसाय करतात. चवथ आतां लागीं पावल्या. मजगतीं, अचकीत आमकां नव्या सुवातेर स्थलांतरीत करपाचो निर्णय घेतलो तेन्ना आमी निरशेले. आमी स्वता चवथी उपरांत वतले अशें प्रशासनाक सांगिल्लें आसलें तरी आमचीं दुकानां काडून उडोवपा खातीर नगरपालिका प्रशासनान गरजेचीं सगळीं पावलां उबारिल्ली पूण मुख्यमंत्र्यांच्या सकारात्मक प्रतिसादा उपरांत आनी चवथी उपरांतच दुकानां हालयतले अशें आश्वासन तांणी दिलां.

मजगतीं बिरेस्तारा सकाळीं नगरपालिका कर्मचारी आनी अधिकारी दुकानां काडपा खातीर गरजेचीं सगळीं उपकरणां घेवन पोरण्या इमारती लागसार जमिल्ले. सकाळीं वीज खात्यान पोरन्या बाजारांत वीज पुरवण कापून उडयल्ली. पूण मुख्यमंत्र्याच्या आदेशाची म्हायती मेळ्ळ्या उपरांत पालिका कर्मचारी परतून आयले.