राज्य वेंचणूक आयुक्तपदा खातीर मिनीनो डिसोझांचो विचार

पणजी : राज्य वेंचणूक आयुक्त (एसईसी) पदा खातीर आदले नागरी सेवा अधिकारी मिनीनो डिसोझा हांचे नावाचो विचार सुरू आसा. निवृत्त आयएएस दौलत हवालदार हांचो कार्यकाळ सोंपिल्ल्यान राज्य वेंचणूक आयुक्तांचें पद रितें जालां. जिल्हो पंचायत वेंचणूक लागीं पाविल्ल्यान बेगिनात बेगीन राज्य वेंचणूक आयुक्तांची (एसईसी) नेमणूक करप गरजेचें थारता.

आयुक्तपदाचो कार्यकाळ 6 वर्सांचो आसलो तरी 65 वर्सांची पिराय पुराय जाल्ल्यान दौलत हवालदार हांंका ह्या पदा वेल्यान मुक्त जावचे पडले. ते वर्सभर ह्या पदाचेर आशिल्ले.

राज्य वेंचणूक आयुक्तपदा खातीर उण्यांत उणीं 40 वर्सांची पिराय आसप गरजेची आसा. 40 वर्सां परस चड पिराय आसपा सयत नागरी सेवेंत उण्यांत उणो 20 वर्सांचो अणभव आसपाची अट आसा. हाका लागून सरकाराक आतां नागरी सेवेंतल्या अधिकाऱ्याची नेमणूक करची पडटली.

जिल्हो पंचायत वेंचणुकेची तयारी आयोगान सुरू केल्या. मतदारसंघ फेररचणुकेची प्रक्रिया सुरू आसा. ती जातकच आरक्षणाची प्रक्रिया सुरू जातली. हाचे खातीर नव्या एसईसीची नेमणूक बेगीन करपाचो विचार सुरू आसा.