आतां शेतकी खातें पिकयतलें फळां

शेतकी संचालक : म्हापश्यां बांदतात चार चेंबर

भांगरभूंय । प्रतिनिधी

पणजी : रसायन वापरून फळां पिकोवपाचे प्रकार बंद करपा खातीर शेतकी खातें फळां पिकोवपा खातीर फुडाकार घेतलें. सुरवेक म्हापश्यां सब-यार्डांत चार चेंबर बांदतले आनी तातूंत फळां घालून एथिनील गॅस सोडटले. ही प्रक्रिया सैमीक आनी सुरक्षीत आसा. चवथी पयली लोकांक रसायन नाशिल्लीं फळां खावपाक मेळटलीं, अशी म्हायती शेतकी संचालक संदीप फळदेसाय हांणी दिली.

रसायनीक तरेन पिकयल्ल्या फळांचेर अन्न आनी वखदां प्रशासन (एफडीएन) घातिल्ले धाडीचे फाटभुंयेर शेतकी खात्याचे कचेरेंत आपयल्ले पत्रकार परिशदेंत फळदेसाय उलयताले.

एफडीए जेन्ना शेतकी उत्पादन, देखीक फळांचेर धाड घालतात तेन्ना ताची जापसालदारकी शेतकी खात्याचेर येता. शेतकी खात्या खाला गोंय शेतकी उत्पादन आनी मार्केटींग बोर्ड स्थापन जाल्यात आनी तांची कचेरी सगळ्या म्हालांनी आसात. देखून ह्या बोर्डा खाला गिरायकांक बरीं फळां मेळचीं हे खातीर उत्पादकांक फळां पिकोवपाची सुविधा तयार करून दिवपाची आमची जापसालदारकी आसा, अशें फळदेसाय हांणी म्हणलें.

फळां चड करून केळीं पिकोवपाचो प्रकार पुराय गोंयभर चलता. तातूंत कार्बायड ह्या रसायनाचो वापर करून तीं पिकयतात आनी ही प्रक्रिया विज्ञानिक आशिल्ल्याचें सांगतात. पूण जेन्ना आमी हो प्रकार पळयलो तेन्ना हे विज्ञानीक प्रक्रियेंत सुदारणा करपाची गरज आमकां दिसली. देखून म्हापशेंच्या सबयार्डांत फळां पिकोवपाचो चेंबर बांदपाचें काम सुरू केलां, अशी म्हायती फळदेसाय हांणी दिली.

सबयार्डांत चार चेंबर येवापाचे आसात आनी दर चेंबरांत 15 टन केळी दर दिसा पिकपाक घालतले. ह्या चेंबरांत एथेलीन गॅस घालतले आनी सैमीक पद्दतीन फळां पिकयतले. ही गॅस सोडपाची एक प्रक्रिया आसता ती आमी करतले. हे चेंबर बांदपाचें काम सुरू आसा आनी चवथी पयली चेंबर सुरू करून चवथीच्या सणांत म्हापशेंच्या लोकांक रसायन नाशिल्लीं फळां मेळटलीं, अशें फळदेसाय हांणी सांगलें.

फक्त केळी आनी आंबे रसायन घालून पिकयतात अश्यो लोकांच्यो कागाळी आसतात. ह्यो कागाळी आंबे आनी केळीं ह्या दोन फळां खातीरूच आसा. एथेनील ही सैमीक गॅस आसा आनी फळां सैमीक तरेन पिकतात तेन्ना ही गॅस तयार जावन फळां पिकोवपाक मजत करता, अशें स्पश्टीकरण फळदेसाय हांणी दिले. उत्तर गोंयांत म्हापश्यां सबयार्डांत चडांत चड केळीं येतात आनी हेर वाठारांत तांची विक्री जाता. दर दिसा 7-8 टन केळीं सबयार्डांत येतात. जेन्ना सणाचे दीस आसतात, देखीक चवथ, दिवाळी आनी दसरो तेन्ना 15 ते 16 टन केळी यार्डांत येतात, अशीं आंकडेवारी फळदेसाय हांणी दिली.