... म्हाका तशें करपाची इत्सा ना

-मंत्री ​दिगंबर कामत हांचें स्पश्ट मत पणजी : डॉ. प्रमोद सावंत हांचे मुख्यमंत्री म्हूण काम म्हाका आवडटा. कारण ते खंयचेंय काम करचे पयलीं विचार करतात, फुडल्या मनशाक आत्मविस्वासांत घेवन चर्चा करून विचारांची अदला बदल करून काम करतात. हांव आमदार आसतना ताणें म्हज्या मतदारसंघांत अशे तरेचे खूब काम केल्यात आनी आयज लेगीत करतात. मुख्यमंत्री डॉ. प्रमोद सावंत सगल्या आमदारांक आनी मंत्र्यांक आपोवन चर्चा करून समस्या सोडोवपाचो यत्न करतात हें हांवें पळयलां. हो म्हजे खातीर बरो अणभव. अशें डॉ. प्रमोद सावंत हांच्या मंत्रीमंडळांत नव्यान सोपूत घेतिल्ले मंत्री दिगंबर कामत हाणें ‘प्रुडंट मिडियाच्या हेड आॅन’ कार्यावळींत दिल्ले मुलाखतींत सांगलें.

दिगंबर कामत हांचो मंत्रीमंडळांत आस्पाव जाल्यार डॉ. प्रमोद सावंत हांच्या मंत्रीमंडळाक धोको निर्माण जावपाक शकता, अशी भायर चर्चा आसा. ह्या विशयाचेर उलयतना तांणें म्हणलें, भाजपांत येतना म्हज्या वरिश्ठांनी म्हाका उंचेल्या पदाची ऑफर दिली आनी केंद्रांतल्या एका वरिश्ठ फुडाऱ्या कडेन म्हजो बरो संबंद आसा. ही संद हांव खंयच्याय वेळार घेतालो, पूण म्हाका तशें करपाची इत्सा ना आनी करचोय ना.

काँग्रेसींत हांव मुख्यमंत्री आशिल्लो. म्हजेर जायते आरोप जाले आनी हांव कायदेशीर संकश्टांत लेगीत पडलो तेन्ना पुराय कार्यकाळ हांव मुख्यमंत्री म्हणून काम करतालो. त्या वेळार काँग्रेस पक्षान म्हाका तेंको दिलो ना. 2022 वर्सा वेंचणुके उपरांत म्हजें नांव विरोधी पक्षाचें फुडारी अशें लेगीत मानूंक नाशिल्लें. तेन्ना काँग्रेस पक्षान आमकां कणसांतल्या कोंड्या भशेन कुशीक काडले.

तुमच्या पर्रीकारा कडेन आशिल्ल्या संबंदा विशीं उलोवपा विशीं तांणी सांगलें, हांव कोणाकूय वायट करूंक ना आनी हांव विचारूय करिना. हांव मुख्यमंत्री आसतना सरकारी कर्मचाऱ्यांक केन्नाच त्रास दिलो ना. कोणा कडेन म्हाका वायटपण ना. हांव देवाचो मनीस म्हणून लोक म्हजेर टिका करतात. पूण त्या प्रसंगाक तांच्या तोंडांत देवाचें नांव येता म्हूण म्हाका समाधान दिसता.

मडगांवच्या लोकांच्या आशीर्वादान आनी मडगांवकारांचे आराध्य दैवत दामबाब हाच्या आशिर्वादान फाटलीं कितलींशींच वर्सां हांव वेंचून येवपाक लागलां. पक्षान म्हाका साश्टीची जापसालदारकी दिल्यार हांव ती मान्य करतलों. सरकारान केल्ल्या उदरगतीच्या वावरांचेर नदर मारल्यार दक्षीण गोंयचे लोकूय फुडले फावट भाजपा सरकारा वांगडा आसतले अशें म्हजें खर मत आसा.