प्रस्न विचारतना अभ्यास आसप गरेजेचेंः कामत

‘नो युवर गुज मेंबर’ कार्यावळींत उलोवपपणजीः पत्रकारांनी पत्रकार परिशदेंत प्रस्न विचारतना रणनीती थारावप गरजेची. हे खातीर प्रस्न विचारतना अभ्यास करून वच्चे. ना जाल्यार उरफाटे प्रस्न करून पत्रकारांक शेणयतले, असो सल्लो जेश्ठ पत्रकार प्रकाश कामत हांणी दिला.

गोंय श्रमीक पत्रकार संघटणेन ‘नो युवर गुज मेंबर’ जेश्ठ पत्रकारां वांगडा संवाद घडोवन हाडपाची कार्यावळ घडोवन हाडली. ह्या वेळार प्रज्ञा गांंवकार राणे हिणें जेश्ठ पत्रकार प्रकाश कामत हांची मुलाखत घेतली. हे मुलाखती वेळार कामत उलयताले. कामत हांणी ह्या वेळार तांचे पत्रकारितेतल्या कार्यकर्दी विशीं खोलायेन म्हायती दिली.

मनोहर पर्रिकार हांचें पत्रकार परिशदेंत जे सुवातेर कॅमेरा लायतात थयसर हांव वचून बसतालो. पर्रिकार म्हज्या प्रस्नाक मदीं-मदीं टाळटाले. पूण कॅमेरा कुशीक बसून प्रस्न विचारले उपरांत कॅमेराचेर म्हजो प्रस्न रिकोर्ड जातालो. उपरांत तुजो प्रस्न पेजाद आशिल्लो आनी तांणी जाप गुठलायली अशें म्हाका कितल्याशाच लोकांनी सांगला, अशें कामत हांणी म्हणलें.

म्हाका हे विशींची समज आशिल्ली. देखून आम्ही तशी रणनीती थारावपाक जाय. जर रणनीती थारयतले आसत जाल्यार अभ्यास आसपाक जाय. पर्रिकार म्हाका म्हणटाले, तुका जर प्रस्न विचारपाचे आसात, जाल्यार म्हाका मेळून विचार. हांगा प्रस्न विचारुं नाका. हेर पत्रकार किताय कितें अर्दवट घालून म्हाका त्रासांत उडयतले. तू कितें विचारता ते तांकां खबर ना. हाचो अर्थ असो, आपूण अभ्यास करूंक ना, अशें कामत हांणी म्हणलें.

अशीच एक घडणूक नौदळाचे पत्रकार परिशदेंत घडली. थंय संरक्षण मंत्री राजनाथ सिंह आनी पर्रिकार हे मुख्यमंत्री आशिल्ले. पाकिस्तान हे वेवसाया खातीर आक्रमक राष्ट्र म्ह़ण तुमी जाहीर करतले व्हय? असो प्रस्न हावेन विचारिल्लो. हो प्रस्न टाळपा खातीर राजनाथ सिंह एकदम उठले. पूण पर्रिकार हांणी उपरांत सिग्नल दिले उपरांत ते बसले आनी कितें तरी बडबडले. परिशदे उपरांत राजनाथ हांणी म्हाका सांगलें, सवाल बहूत अच्छा था, पर उस सवाल का मै जवाब नही देना चाहता हू अशें म्हणून गेले, अशें कामत हांणी सांगलें.

सांगपाचो उद्देश असो, आमी अभ्यास नासतना अशें प्रस्न करपाक शकनात. राष्ट्रीय पांवड्यार तुमी ते भशेन अभ्यास करपाकच जाय. जर तुमी गृहपाठ करिनासतना गेले आनी तांणी परतो प्रस्न केलो जाल्यार तुमी थंयसरच शेणटले, अशें कामत हांणी म्हणलें.