वीज लायनमॅनांचे सुरक्षेची दखल घेवची

लायनमॅनाचो जीव वाटावप म्हणल्यार एका कुटुंबाचो आदार वाटावप आनी समाजाचे सेवेंत मोलादीक मनशाचो जीव राखप.

गोंयां सारक्या प्रगत आनी पर्यटन प्रधान राज्याचे उदरगतींत वीज वेवस्थेची भुमिका खूब म्हत्वाची. आयज दरेक घर, कार्यालय, उद्देग, वेपारी आस्थापन आनी शेती विजेचेर आदारून आसा. अखंड वीज पुरवण ही आर्विल्ल्या जिणेची मुळावी गरज जाल्या.
पूण ह्या उजवाडा फाटल्यान जायत्या कर्मचाऱ्यांचे कश्ट, त्याग आनी जोखीम आसा. सगल्यांत धोक्याचे काम करपी कर्मचारी म्हळ्यार वीज लायनमॅन. उंच खांब्यार चडपी, जिव्या वीज सरयां लागसार काम करपी आनी पावसाच्या दिसांनी वारें, वादळांत आनी रातच्या वेळार सेवा दिवपी लायनमॅन हो खऱ्या अर्थान वीज वेवस्थेचो फाटीचो कणो. पूण दुर्दैवान दर वर्सा गोंयांत काम करतना लायनमॅनांक अपघाती मरण येवपाच्यो घडणुको घडटात. ही गजाल फक्त एकाच खात्याक मर्यादीत ना तर पुराय समाजाचो हुस्को करपा सारकी गजाल.
लायनमॅनाचो दरेक दीस जोखमांनी भरिल्ली आसता. सादारण नागरिकां खातीर वीज पुरवणेंत खंड पडप म्हणल्यार फक्त कांय वरांचो त्रास; पूण तो दोश सुदारपा खातीर एक लायनमॅन स्वताचो जीव धोक्यांत घालून वावुरता. उंच वीज खांबो चडटना वा तंत्रीक दोश दुरुस्त करतना ल्हान चूक जाल्यार ताचो जीव वचूं येता. देखून ह्या कर्मचाऱ्यांची सुरक्षीतताय फक्त प्रशासकी नेम म्हणून न्हय, तर मनशाचे नदरेन पळोवपाची गरज आसा.
लायनमॅनांच्या अपघाता फाटल्यान जायतीं कारणां आसूं येतात. केन्ना केन्नाय पोरणी वीज केबल, पोरणी उपकरणां, फावो त्या सुरक्षेच्या उपकरणांचो उणाव, कामांतलो ताण वाडप वा अचकीत तंत्रीक समस्या निर्माण जावप जायते फावटीं कर्मचारी स्वताच्या अणभवाचेर आनी कुशळटायेचेर काम पुराय करतात; पूण आधुनीक सुरक्षेचे नदरेन फक्त अणभव पुरो जायना. बदलत्या तंत्रगिन्याना प्रमाण सतत प्रशिक्षण आनी अद्ययावत उपकरणांची गरज आसा.
वीज खात्यान पयलीं लायनमॅनांक मेळपी सुरक्षेच्या उपकरणांचो नेमान नियाळ घेवचो. विद्युत इन्सुलेटेड हात मोजे, हॅल्मेट, सुरक्षीत बूट, कुडीक आदार दिवपी सुरक्षीत पट्टे, लायन तपासणी उपकरणां आनी हेर गरजेचीं उपकरणां उच्च दर्जाचीं आसूंक जाय. जायते फावटीं उपकरणां उपलब्ध आसलीं तरी तांची नेमान तपासणी आनी देखरेख जायना. देखून दरेका खात्यांतल्या सुरक्षेच्या उपकरणांची वेगळी नोंद दवरप आनी वेळा वेळार तपासप गरजेचें आसा.
ते भायर लायनमॅनांक नेमान सुरक्षेचें प्रशिक्षण सक्तीचें करचें. कर्मचाऱ्यांक नव्या तंत्रगिन्यानाचें प्रशिक्षण, आपत्कालीन हाताळणी पद्दती, विद्युत सुरक्षेचे उपाय आनी अपघात जाल्यार पयली मजत हांचे विशीं प्रशिक्षण दिवचें. प्रशिक्षण फक्त एक औपचारीक कार्यावळ आसूंक फावना, पूण प्रत्यक्ष कामाक जोडूंक जाय. अणभव आशिल्ल्या कर्मचाऱ्यांच्या गिन्यानाचो आनी आधुनीक तंत्रगिन्यानाचो योग्य समन्वय केल्यार अपघातांचो आंकडो उणो जावंक शकता.
वीज पुरवण बंद जाल्या हाची खात्री करिनासतना काम सुरू करप ही सामकी धोक्याची गजाल. देखून खंयचीय दुरुस्ती करचे पयलीं वीज पुरवण बंद, संबंदीत लायन सुरक्षीत आसा आनी वरिश्ठ अधिकाऱ्यां कडल्यान परवानगी घेतल्या हाची खात्री करपा खातीर खर प्रक्रिया चालीक लावपाक जाय. ते खातीर डिजिटल निरिक्षण प्रणाली वापरूं येता. लायनीचो खंयचो वाठार बंद आसा, खंयच्या कर्मचाऱ्यांक कामाची जापसालदारकी दिल्या आनी काम पुराय जालां हाची म्हायती तंत्रगिन्याना वरवीं नोंद करूं येता.
लायनमॅनांचेर कामाचे भार हो सुरक्षेच्या मळारय म्हत्वाचो विशय. गिरायकांच्यो कागाळी वाडत आशिल्ल्यान, कर्मचाऱ्यांचो उणाव आनी ताकतिकेच्या कामाच्या दबावाक लागून कर्मचाऱ्यांक चड करून थोड्याच वेळा भितर काम पुराय करपाक धांवपळ करची पडटा. उतावीळ आनी थकवो हीं अपघाताचीं मुखेल कारणां आसूं येतात. देखून वीज खात्यान गरजेची मनीसबळ दिवपाची गरज आसा, कर्मचाऱ्यांच्या कामाची योग्य येवजण करपाची आनी तांकां सुसेग घेवपाक फावो तो वेळ दिवपाची गरज आसा.
खास करून पावसाळ्यांत आनी वादळी हवामानांत लायनमॅनांचें काम चड धोक्याचे जाता. गोंयांत व्हड पावस, वादळ आनी झाडां पडपाक लागून वीज लायनींक लुकसाण जावपाच्यो घडणुको घडटात. अशा वेळार आपत्कालीन सेवा दितना कर्मचाऱ्यांचे सुरक्षेक प्राधान्य दिवचें. आणिबाणीचे परिस्थिती खातीर खासा प्रशिक्षीत पंगड, अतिरिक्त सुरक्षेचीं उपकरणां आनी योग्य नियोजन गरजेचें आसता.
लायनमॅनांच्या कुटुंबांचोय विचार करप गरजेचें. चुकून एका कर्मचाऱ्याक मरण आयलें जाल्यार ताच्या कुटुंबाचेर व्हड संकश्ट येता. अशा वेळार अर्थीक मजत, नोकरी आनी हेर मजत दिवप गरजेचें आसता; पूण ताचे परस चड म्हत्वाचें म्हणल्यार खात्यान अशे अपघात जावचेच न्हय असो यत्न करचो. कारण लुकसाण भरपाय दिल्यार व्हगडायिल्लें जिवीत परतून हाडूंक मेळना.
वीज खात्यान दर एका अपघाताची पुराय चवकशी करून तातूंतल्यान शिकपाची गरज आसा. अपघाताचीं कारणां सोदून काडून बेगोबेग उपाय केल्यार फुडले अपघात टाळूंक येतात. सुरक्षेची संस्कृताय फक्त नेमा वरवीं निर्माण जायना, ती दरेका अधिकारी आनी कर्मचाऱ्याच्या मनांत रुजची पडटा.
लायनमॅन हे खरे झुजारी जे समाजाची सेवा करपा खातीर आपलो जीव धोक्यांत घालतात. तांच्या कश्टाक लागून हजारांनी घरांनी लायटी पेट्टात, उद्देगधंदे चलतात आनी जिवीत सुटसुटीत उरता. देखून तांचे सुरक्षे कडेन आडनदर करप म्हणल्यार समाजाच्या एका म्हत्वाच्या खांब्या कडेन दुर्लक्ष करप. अपघाता उपरांत उपाय करचे परस, अपघात जावचे न्हय म्हूण गोंय वीज खात्यान घट्ट, आधुनीक आनी प्रभावी सुरक्षेची वेवस्था स्थापन करपाचो वेळ आयला. कारण लायनमॅनाचो जीव वाटावप म्हणल्यार एका कुटुंबाचो आदार वाटावप आनी समाजाचे सेवेंत मोलादीक मनशाचो जीव राखप.

सुदिन वि. कुर्डीकार
8275425404