कोयराचें हक्काचें राज्य

जंय पर्यटक आनी येरादारी चड, थंय कोयराचें राज्य चलता, अशें सरकारी यंत्रणाच म्हणटा.

गोंयांत फाटल्या पांच म्हयन्यांत (जानेवारी ते मे) सादारण 159 टन कोयर पुंजायला. राष्ट्रीय आनी राज्य म्हामार्गां कुशीक पडिल्लो. हेर कडेन हाचे दुपेटीन आसूं येता. सगल्यांत चड कोयर उत्तर गोंयांत सांपडलो. 73 टन. दक्षीण गोंयांत 46 टन आनी मध्य गोंयांत 40 टन कोयर मेळ्ळा. भायल्या राज्यांतल्यान येवन कोणें तो उडोवंक ना, तर खाश्या गोंयकारांनीच हो पराक्रम केला. गोंयांत कोयर हो एक पेझाद वेवसाय जावपाच्या मार्गार आसा. घडये डीआरएस येवजण सुरू जातकच थोडे उणो जायत. जंय पर्यटक आनी येरादारी चड, थंय कोयराचें राज्य चलता, अशें सरकारी यंत्रणाच म्हणटा. म्हामार्गाचेर कोयर ही पर्यावरणा मुखार उबी जाल्ली व्हडली समस्या म्हणचें पडटलें! बारीकसाणेन पळोवंक गेल्यार कोयर ही तशी समस्या न्हय, तर तें चुकीच्या जाग्यार पडिल्लें संसाधन. ताचो फायदो घेवपाक तशी वेवस्था जाय.
कोयराक लागून सैम ख्यास्त दिता. हें हुंवार येतकच कळटा. कोयर धर्तरी निर्माण करिना, तर मनशांच्या संवयींक लागून तो जाता. कांय जाण अदीं मदीं नितळसाण करतात, मात कोयरूच करप ना, हेच खरे संस्कार. आपलो गांव, शार नितळ करप दरेका नागरिकाच्या हातांत आसता. तेन्ना फुडल्या पिळग्यां खातीर आमी कोयर उणो करपाक जाय. एक प्लास्टीक पोती खीणभर वांगड दिता, मात पृथ्वीक शेंकड्यांनी वर्सांची ख्यास्त. देखून कोणेच कोयर उडोवपाक जायना. स्वराज्य संस्थांनीय तो एकठांय करपाक चड सक्रीय जावंक जाय. कोयराची अर्दी समस्या त्योच ना करपाक शकतात. शाळांनी कोयराक लागून जावपी समस्या, दुयेंसां हे विशीं जागृताय जाय. कारण हो विशय फक्त नितळसाणेचो न्हय, तर पर्यावरण आनी पर्यटना कडेन जोडिल्लो आसा.
कोयर नेमको कसलो, कसो जाता ताचो अभ्यास जावचो. प्लास्टिकाचो कोयर सादारण 50 टक्के आसता खंय. उदकाच्यो बाटल्यो, पोतयो, चिप्स आनी हेर जिनसांचीं पाकिटां, स्ट्रो, डिस्पोजीबल कप, बश्यो आनी हेर. कंवचेच्यो बाटल्यो, कॅन, लोखंड आनी हेर धातुंचे कुडके, रबर, थर्माकोल, बांदकामाचे फातर, शिमीट, विटो, फरश्यांच्यो राशी, जैवीक कोयर, उश्टें… ई- कोयरूय फुडाराक चड जावपाचो आसा. खंयचो कोयर चड ताचोय नियाळ जाय. गोंयांत पर्यटक चड, म्हणटकच दर्यादेगांचेर प्लास्टीक कोयर चड. वेवसायिकांक कोयराचो विलो लावपाक खाशेली तजवीज करून दिवंक जाय. बाटल्यो, पोतयां सारके एकदांच वापरपाचें प्लास्टीक वाडलां. ओलो आनी सुको कोयर वेगळो दवरपी खूब थोडे लोक. खरें म्हणल्यार जांचे कडेन जमनी, पोरसूं आसा, तांणी ओलो कोयर पालिकेक दिवपाक जायना. सारें म्हूण तो वापरूं येता. निश्काळजीपणाक लागून कोयर वाडटा. हेर राज्यांतल्यान व्हांवून आयिल्लो कोयर दर्यावेळांचेर येवन पडटा. भायर पार्ट्यो जातात, जात्रा, काले, फेस्तां जातात, थंयूय कोयर जाता. प्लास्टीक बाटली ना जावपाक साडेचारशीं वर्सां लागूं येतात. नायलाॅनाचें जाळें सशें वर्सां मेरेन तिगता खंय. कंवची तर तशीच उरता. कोयर जावपाक दिवंक जायना. जाल्यार ताचो पुनर्वापर जाय. गोंयांत कोयरा प्रकल्प आसात. तसले ल्हान प्रकल्प दरेका तालुक्यांत जावचे.
गोंयांत फाटलीं 30 वर्सां कोयराची समस्या काबार करपाचे साबार यत्न जाल्यात. अब्जांनी रुपया खर्च जाल्यात आसतले. पूण समस्या आसा थंयच आसा. उरफाटी वाडल्या. कोयर रि- सायकल करून, सारें म्हूण वापरुं येता. ब्लॅक स्पोटांचेर ड्रोना वरवीं लक्ष दवरुंक जाय. कोण कोयर करता ताका अर्थीक दंड दिवचो. ताचो व्हिडियो काडून व्हायरल करचो न्हय. कोयर हो आमचे जिणेंशैलीचो हारसो, हें मतींत दवरल्यार थोडे तरी जापसालदार लोक कोयर करचे नात.