चमत्कार ही सैमा आड कृती….

नामनेचे शास्त्रज्ञ आल्बर्ट आयस्टायन म्हणटात, ‘जगांत दोन तरांच्या विचारांचे लोक आसात. एका पंगडांतल्या लोकांक, सैमांतल्यो सगल्यो घडणुको चमत्कार अश्यो दिसतात तर दुसर्‍यांक चमत्कार म्हणप मान्य जायना.’ एका तेंपार ज्ञानाची व्याप्ती खूब मर्यादीत आशिल्ली. तेन्ना सैमांतले सगलें चमत्कार अशें दिसतालें. देखीक; थारावीक तेंपार पावस पडटा. गडगड येता. जोगलां चकचकतात. मदींच मोड येता. सैमांतल्यो ह्यो घडणुको त्या तेंपार मनशाक अजापीत करताल्यो, पूण फुडें ल्हवू- ल्हवू ताचे बुद्दीचो विकास जावपाक लागलो आनी विज्ञानाच्या उदरगतीक लागून ज्ञान मेळोवपाच्या प्रक्रियेचो विकास जायत गेलो. ते खातीर सैमांतल्या घडणुकां कडेन पळोवपाची नदर बदलली. विज्ञानान तर अशें दाखोवन दिलां, प्रत्येक सैमीक कृती फाटल्यान विज्ञानीक कारण आसपाक जाय. ते सोदून काडप हेंच विज्ञानाचे मुखेल काम आसा. होच विचार आयस्टायनच्या वयल्या विधानांत दिसून येता.
आयज विज्ञान खूब फुडें पावलां. एका काळांत ह्या सैमां फाटलें गूढ मनशाच्या आकलना भायलें आसा अशें दिसतालें. पूण विज्ञानान तें आकलनाच्या कक्षेंत हाडलां. होच तर खरो चमत्कार मानपाक जाय, पूण तें समजूपाक आमची बुदवंतकाय खंय तरी उणें पडटा, अशें दिसता. म्हणून एकविसाव्या शेंकड्यांतय चमत्कार मानपी लोक आसात.
आदले योगीबाबा चमत्कारांच्या कृतींचेर चड भर दिताले. विसाव्या शेंकड्यांतले सत्तरीच्या दशकांत एक बाबा बरोच गाजतालो. ताणें मुंबयंत उदकाचेर चलपाचो एक जाहीर कार्यक्रम केल्लो. लोक तिकीट काडून गेल्ले. पत्रकाराय आशिल्ले. योगीन सगल्यांत पयलीं आपल्यो विधी केल्यो आनी प्रयोगा खातीर तयार केल्ल्या एका खाशेल्या स्विमींग पुलांत पांय दवरता थंय आसा, एकदम उदकांत पडलो. ही बातमी मुंबयच्या व्हड पेपरांनी छापून आयिल्ली. तरीय तांच्या भक्तांची संख्या मात्तूय उणें जाली ना. होच तर व्हड चमत्कार आसा. हे गजालीक आतां साठ वर्सां परस चड जायत आयलीं. तरी बाबांचे प्रस्थ उणें जावपा बदला वाडतूच आसा. कितलेशे बाबा बंदखणींत आसात. कांय जाण भलायकीचें कारण दिवन पॅरोलाचेर भायर भोंवतात. बलात्कारा सारखे गुन्यांव सिद्ध जाल्यात तरी तांकां व्हड येवकार मेळटा. तांचे भक्तूय वाडल्यात.
बरें ह्या भक्तां मदीं गरीब आनी पिडीत लोकांची संख्या चड आसली तर अजाप म्हणपाक जावंचे ना. तांचे परिस्थितीचो फायदो घेवप होच आमचे शोशण प्रक्रियेचा तो एक भाग जावन आसा. तांच्या जिवितांतल्यो समस्या हीच तर आमच्या राजकी आनी बाबा- बुवांच्या लाभाची सोय आसा, पूण जेन्ना शिकिल्लेय लोक अश्या चमत्कारांक बळी पडटात, तें पळोवन चमत्कार ही प्रक्रिया आमच्या जिविताचो एक वांटो आसा काय, असो प्रश्न उबो जाता.
खास करून सांगपाचें जाल्यार ज्या शिकिल्ल्या घटका कडेन आधुनीक समाजाचो मार्गदर्शक म्हणून पळयतात, तोच घटक हे अनिश्ट प्रक्रियेचा बळी वता. समृद्ध समाजाक हें खूब वायट आसा.
आपल्या पोरण्या गिन्याना विशीं आशिल्लो अहंकार आनी तातूंतल्यान निर्माण जाल्लो न्यूनगंड, हें ताचे फाटलें एक कारण अशें आसूं येता. पूण होच घटक विज्ञान तंत्रज्ञानाचे फायदे घेवपाक सगल्यांत मुखार येता आनी तोच विज्ञानाची नसाय करता. हें वागणें विसंगत आसलें तरी ही आमच्या समाजांतली वस्तुस्थिती. इतलेंच न्हय तर तशी मानसिकताय निर्माण करपाक एक व्हड पंगड खूब पयलीं सावन सक्रीय आसा. तोच पुरोगामी कामाक विरोध करीत आयला. अंधश्रद्धा वा बाबा- बुवांच्या कथीत चमत्कारां आड आवाज केल्यार विरोध करता. पूण ते खातीर आपलोच समाज मागासलेलो उरता हाची तांकां मात्तूय खंत दिसना.
18 व्या शेंकड्यांतले नामनेचे विवेकवादी डेवीड ह्युम म्हणटात, ‘चमत्कार ही सैमाच्या आड कृती आसा.’ म्हणजेच प्रत्येक घडणूक सैमीक नेमा प्रमाणे चलता. पूण सद्या सोशल मिडियाचेर बरी म्हायती दिवपाचे बदला तिचो गैरवापर चड जावपाक लागला. वयर सांगिल्लो उदकाचेर चलपाचो चमत्कार, ही कृती सैमाच्या आड आशिल्ली. जर कोणय तसो प्रयोग करता जावंये तर तो जादुचो प्रकार म्हणजे दिश्टीभ्रम समजुचो. कारण खंयची जड वस्त उदकांत बुडटा ही विज्ञानीक वस्तुस्थिती आसा.
खरें म्हणल्यार ह्या विज्ञान युगांत जर खंयचीय कृती सैमाच्या आड वता अशें दिसलें जाल्यार ताच्या फाटलें कारण सोदून काडप हें आमचें पयलें कर्तव्य, पूण चड करून अश्या घडणुकी बाबतींत अर्दकुटी म्हायती आसता वा जाणा जावन लोकांची दिकाभूल करपाचो यत्न आसता.
दैवी चमत्काराच्या नांवान खुबश्यो असैमीक कृती परंपरा वा श्रद्धा म्हणून मनोवपाची प्रथा आजूनय चालू आसात. देखीक : इंगळ्या वयल्यान धांवप, गरम तेलांतल्यान वडे काडप, खिळ्यांचेर न्हिदप, अशे अनेक प्रकार चलतात. आमचे कुडीक वेदना वा दुखापत सोंसून घेवपाची मर्यादा आसा. जर ह्यो वेदना सहन करपाच्या मर्यादे भायर आसत तर कुडीक दुखापत जावपाची शक्यताय आसा. पूण वयल्यो प्रथा म्हणजेच स्वताच्या कुडीक त्रास करून घेवप अशें जाता. हें सैमाच्या आड आसा. खरें म्हणल्यार एकविसाव्या शेंकड्यांत ताचे म्हत्व उणें जावपाक जाय आशिल्लें. तरी सोशल मिडिया वयले प्रसिद्धी खातीर ताचो प्रभाव नेटान वाडपाक लागला.
संवसारभर सैमांत अजापाच्यो घडणुको घडटात. कांय कडेन गरम उदकाचे झरे व्हांवतात. गोंयांतय अश्यो सैमीक घडणुको आसात. नेत्रावळीचें बुडबुडें तळें तर एक अजापूच, पूण तो चमत्कार म्हणून मानप समा जायना. त्या फाटल्यान शास्त्रीय कारण आसूंक जाय. तें सोदून काडप आमचें कर्तव्य.
एका तेंपार दक्षिण भारतांत एका बाबाचें बरेंच प्रस्थ आशिल्लें. व्हड- व्हड राजकी फुडारी ताचे भक्त आशिल्ले. तो हवेंतल्यान भांगराच्यो वस्ती काडून भक्तांक दितालो. एका उत्सवा दिसा तो तोंडातल्यान लिंग काडटालो. हे चमत्कार पळोवपाक पयसुल्ल्यान भक्त येताले. एका टिव्ही कॅमेरामॅनाच्या चित्रीकरणांत ताच्या एका चमत्कारा फाटली ट्रीक उगत्यार आयली. थळावे टिव्ही चॅनलाचेर सगल्यांनी ती पळयली. तरी ताच्या भक्तांची संख्या उणी जाली ना.
चमत्कार मानप हाचो अर्थ सैमाच्या आड वचप अशें जाता. आयच्या विज्ञान युगांत तांचे समर्थन करप बाराबर जायना.

विज्ञानदूत श्रीकांत शंभू नागवेंकार
9096512359